A adxudicación destas obras permitirá mellorar a estrutura do inmoble, a seguridade de usuarios e persoal, e axustar a instalación ás directrices do Código Técnico da Edificación
O Concello da Coruña informa de que se adxudicaron as obras de reforma do centro cívico Dos rosales, o que permitirá resolver as deficiencias estruturais -, especialmente problemas de humedades-que presenta este inmoble, cuxa construción se finalizou en 2008, ao tempo que se axusta ao Código Técnico da Edificación e se mellora a seguridade de usuarios e persoal.
Unha vez analizadas as 6 propostas presentadas a este proxecto encargado pola Concellaría de Servizos Sociais, o Concello adxudicou as obras a Construcións Anxo Jove por un importe final de 265.626,50 euros, o que supón un aforro do 22,6%
-en concreto, 77.560,19 euros- con respecto ao presuposto de licitación.
O prazo de execución da reforma do centro cívico Dos rosales é de 4 meses. Na actualidade, o edificio, de 1.124 metros cadrados e situado no número 1 da praza Elíptica, presenta unha serie de patoloxías relacionadas sobre todo con humedades en pavimentos, cerramentos e cuberta, e que, á súa vez, xeran outros problemas na estrutura do inmoble, como corrosión de vigas metálicas, danos na cuberta e problemas de ventilación.
O Goberno municipal quere aproveitar a necesidade de realizar estas obras de remodelación do centro cívico para mellorar tamén a seguridade dos usuarios e do persoal, adecuando o inmoble ás directrices que marca o Código Técnico da Edificación.
Deste xeito, adaptaranse os percorridos de evacuación, redefinindo a escaleira existente, ampliándoa e cambiando o seu trazado. Ademais, en resposta a unha solicitude do propio persoal do centro, delimitarase un pequeno recinto na zona de acceso para deixar un espazo para almacén. Tamén se limparán os sumidoiros e canaletas de cuberta e patio exterior -repoñéndoos en caso de estar deteriorados ou ampliándoos en caso de resultar insuficientes- e instalaranse tres novas luminarias na zona de recepción.
OUTROS PROXECTOS
A reforma do edificio Dos rosales forma parte dun ambicioso plan da área de Servizos Sociais para mellorar as infraestruturas cívicas municipais durante o período 2013-2015. O investimento programado para 2014 alcanzou os 900.000 euros. Así, este mesmo ano remataron os traballos de acondicionamento do centro cívico de Palavea, onde se reparou a cuberta e se executaron obras no interior do inmoble para adaptalo ás necesidades dos veciños do barrio: máis espazo, maior luminosidade e mellor climatización. Tratouse da primeira reforma que se levou a cabo no centro cívico dende a súa posta en marcha en 1991.
A principios de ano tamén se finalizaron as obras de acondicionamento do centro cívico municipal de Monte Alto, que consistiron na remodelación da entrada do edificio dende a praza dos Avós e na ampliación do espazo dedicado ao servizo municipal de canguros co obxectivo de poder situar unha ludoteca. Foron os traballos de mellora máis importantes efectuados neste inmoble dende a súa inauguración en 1995.
O Concello tamén comezou as obras de rehabilitación e reestruturación parcial do antigo Goberno Militar para destinar unha parte a centro cívico e local da asociación de veciños da Cidade Vella. O proxecto execútase tras lograr a cesión gratuíta deste inmoble de gran valor histórico e construído no século XVII, que alcanza os 3.800 metros cadrados e cuxo valor contable é de 12 millóns de euros. O investimento do Goberno local nesta obra é de 459.437 euros -adxudicouse en novembro- e ten un prazo de execución de 4 meses. Dos 3.800 metros cadrados de superficie construída e distribuída en catro plantas, rehabilitaranse 897,55 metros cadrados entre a planta baixa (294,47), a primeira (260,08) e a segunda (343).
