A Concellería de Mobilidade anuncia que desde este venres estarán habilitadas dúas novas paradas de bus: unha ao final da rúa Xubias de Arriba e outra fronte ao Hospital de Oza
A Concellería de Mobilidade anuncia a ampliación do percorrido da liña de bus 2A para dar resposta ás peticións da veciñanza, das persoas usuarias do Colexio de educación especial Santiago Apóstol e da Compañía de Tranvías da Coruña que levan tempo demandando que esta liña chegue ata o final das Xubias.
O percorrido actual da liña 2A vai do Hospital Abente y Lago ao Hospital de Oza e volve en sentido contrario. O concello habilitará desde este venres, día 7 de febreiro, dúas novas paradas de bus: unha ao final da rúa Xubias de Arriba que servirá de cabeceira da liña e outra fronte ao Hospital de Oza para que todas as persoas usuarias deste centro hospitalario que veñan desde A Coruña poidan acceder a el de forma directa.
Segundo o edil de Mobilidade, Juan Díaz Villoslada, con esta acción “trátase de mellorar a conexión da cidade cos hospitais e de facilitar o acceso das persoas usuarias a estes centros hospitalarios, promovendo a mobilidade en transporte público”.
