Valentín González Formoso visitou hoxe o municipio acompañado do alcalde, Carlos Ladra, e a deputada Ana Lamas
O Concello de Cabanas continúa co seu proxecto de rehabilitación da Escola Laica do municipio para convertela nun gran espazo cultural. Unha ambiciosa iniciativa para a que seguirá contando co apoio técnico e económico da Deputación da Coruña.
Así o anunciaron esta mañá o presidente da institución provincial, Valentín González Formoso, e o alcalde de Cabanas, Carlos Ladra, que xunto coa deputada de Benestar Social, Ana Lamas, e outros edís do goberno municipal visitaron esta mañá este antigo edificio indiano, no que a Deputación investiu nos últimos anos 190.000 euros en diversas fases de obras de reforma que incluiron a completa renovación da cuberta, a eliminación das filtracións de auga da fachada, o adecentamento exterior do inmoble e a construción dun amplo salón de actos no seu interior.
“Trátase dun edificio catalogado, un equipamento público que forma parte do patrimonio histórico de Cabanas e que, co seu uso futuro como Casa da Cultura, volverá a ser dedicado aos fins culturais para o que foi creado”, afirmou o presidente da Deputación que expresou a súa satisfacción de que os fondos que a institución provincial achega aos concellos a través do Plan Único contribúan a desenvolver proxectos coma este.
Formoso lembrou que a Deputación investiu en Cabanas algo máis de 2,7 millóns de euros nos últimos catro anos, dos que 1,8 proceden dos investimentos do Plan Único (POS+) que axudan a mellorar as infraestruturas e os servizos públicos do municipio.
O alcalde, Carlos Ladra Brage, anunciou que o goberno municipal seguirá apostando pola recuperación da Escola Laica, destinando parte dos fondos do POS+2020 a ampliar o espazo de aparcamento do recinto, que se queda pequeno para o uso futuro que pretenden darlle a esta infraestrutura.
“Ademáis, necesitamos habilitalo por dentro con butacas para o salón de actos, estanterías para usar parte das instalacións coma biblioteca…para o que solicitamos o apoio e a colaboración da Deputación”, afirmou o rexedor cabanés, que sostivo que os seus plans son poder comezar a darlle uso a parte do inmoble a finais deste ano ou principios de 2021.
Visita á empresa Do Acibreiro
Durante a mañá de hoxe, o presidente provincial e o alcalde de Cabanas visitaron tamén no polígono de Vilar do Colo as instalacións da empresa local de carpintería e ebanistería “Do Acibreiro”.
Acompañados do dono e xerente da empresa, José Luis Naveiras Fraga, percorreron as instalacións da nave e coñeceron de primeira man a actividade da mesma e os diferentes produtos de madeira que traballan.
