Valentín González Formoso e Manuel Vázquez Faraldo asinaron un convenio que establece que a FAEPAC analizará as facturas eléctricas municipais e asesorará o concello en todas as actuacións que desenvolva en materia enerxética
A Fundación Axencia Enerxética Provincial da Coruña (FAEPAC), dependente da Deputación da Coruña, asesorará o Concello de Miño en materia de aforro e eficiencia enerxética. Así o establece o convenio asinado entre o presidente provincial, Valentín González Formoso, e o alcalde da localidade, Manuel Vázquez Faraldo.
Os técnicos da FAEPAC realizarán unha análise enerxética das instalacións e dependencias municipais do concello, co obxectivo de establecer un plan personalizado de mellora da eficiencia enerxética, uso racional da enerxía e fomento de fontes renovables. A axencia provincial tamén se compromete a prestar asesoramento técnico en todas as actuacións que desenvolva o Concello de Miño en materia enerxética.
Neste sentido, realizarase un seguimento e control do consumo de electricidade, auga quente e calefacción dos servizos públicos e manterase informado ao concello sobre as modificacións lexislativas e tarifarias, as convocatorias de axudas públicas e os novos materiais, produtos sistemas e servizos susceptibles de ser implantados nas instalacións municipais. Así mesmo, a FAEPAC encargarase da formación do persoal do Concello, para que adquiran as competencias necesarias para asegurar a redución das emisións e a mellora da calidade ambiental no municipio.
González Formoso manifestou que, a través da prestación destes servizos, un dos obxectivos do actual goberno provincial é “utilizar o coñecemento da FAEPAC para axudar os concellos a aforrar na súa factura eléctrica”, un gasto que para algúns municipios do ámbito rural supón unha das maiores partida do seu gasto corrente.
