O Executivo municipal levará á próxima Xunta de Goberno Local a aprobación inicial destas intervencións por petición da veciñanza do núcleo
A Concellería de Urbanismo, Infraestruturas e Mobilidade levará á próxima Xunta de Goberno Local a aprobación inicial do proxecto de expropiación de dúas construcións localizadas en Antonio Insua Rivas nº 38 redactado polas arquitectas Cristina Ouzande e Cristina Ezcurra co obxectivo de mellorar substancialmente o espazo público do núcleo tradicional e para unha mellor conexión tanto visual como de mobilidade entre o local social e o entorno do lavadoiro e a fonte de San Vicente de Elviña.
O proxecto de expropiación conta con 24,29 metros cadrados correspondentes a dúas construcións en planta baixa cun investimento próximo aos 11.000 euros.
Canto ao proxecto de reurbanización, supón unha mellora ambiental da contorna, a recuperación da antiga fonte de San Vicente de Elviña e a eliminación de elementos desconformes do lavadoiro. Tamén mellorará a mobilidade peonil e estancial en todo o espazo público ao unificar a contorna do lavadoiro ao carón da estrada
provincial coa contorna do local social situado alén, e unha mellora notable tanto na calidade do mobiliario urbano e os pavimentos como nas infraestruturas.
Esta decisión da Concellería responde a unha petición da veciñanza, concretamente da Asociación de Veciños dos Rexumeiros, despois de reunirse o concelleiro e o seu equipo con esta entidade e presentarlle o proxecto. Neste encontro, o pasado mes de outubro, a asociación propuxo unha serie de cambios que foron acollidos pola Concellería no proxecto. Posteriormente, presentouse o proxecto ao servizo de Patrimonio Cultural da Xunta de Galicia e tomouse a decisión de que neste punto reubicarase o cruceiro que actualmente está situado nun ámbito secundario e con moi pouca presenza.
