A concelleira Eva Martínez Acón inaugurou este evento que organizan Espazocoop e o Concello no marco dun convenio de colaboración para desenvolveren actividades relacionadas co emprendemento
A concelleira de Innovación, Industria, Emprego e Consumo, Eva Martínez Acón, asistiu esta mañá ao acto inaugural da Xornada de Financiamento no Centro de Empresas Municipal A Grela, organizada por Espazocoop e o Concello da Coruña no marco dun convenio de colaboración para desenvolver actividades diversas relacionadas co emprendemento.
A xornada é un evento en que entidades de finanzas éticas e cooperativas poden coñecer 10 proxectos que participan nos programas de apoio ao emprendemento realizados polo Concello da Coruña, e valorar a conveniencia de lles outorgar financiamento responsable. A iniciativa supón un punto de apoio a eses proxectos ao lles ofrecer un abano amplo de entidades financiadoras ás que poder presentarse.
Esta cita pretende mostrar entidades de financiamento responsable e as súas principais características de financiamento entre as persoas promotoras dos proxectos participantes. Ademais, é unha oportunidade única para dar a coñecer proxectos de emprendemento, preferentemente colectivo, ante un foro de financiamento. Outro dos obxectivos desta iniciativa é o de favorecer un networking efectivo para promotores, empresas e persoas autónomas e entidades de
Nota de Prensa
financiamento, que permitan afondar no coñecemento mutuo e o establecemento de redes de colaboración que favorezan a creación de emprego.
Acón destacou o evento como unha “intensa xornada na que poremos o foco no modelo da economía social, a economía que prioriza as persoas” e que “nos servirá para valorar moitas propostas e, deste xeito, abrir un camino que confío que nos levará a acadar financiamento por parte das entidades aquí presentes”.
