O Goberno municipal garante a formación especializada dos membros desta unidade para os próximos catro anos
O tenente de alcalde de Seguridade e Mobilidade, Julio Flores, acompañado da xefatura do Servizo de Extinción de Incendios e Salvamento (SEIS), informou esta mañá do impulso definitivo da Unidade de Rescate en Litoral do SEIS coa presenza dos bombeiros desta unidade especializada nas alertas por temporal e nos eventos multitudinarios que se desenvolvan na costa urbana.
“Ao longo destes case catro anos de mandato municipal, o SEIS apostou pola formación especializada para poder realizar rescates en acantilados, atender incendios en buques ou resolver situacións que se poidan formular con mercadorías perigosas” sinalou Flores e continuou “dende hai un ano, un número importante de bombeiros estivéronse a preparar para atender puntualmente rescates e buscas na costa urbana en colaboración con servizos de rescate doutras administracións públicas, e mesmo realizaron probas con éxito da eficacia do seu traballo preventivo na noite de San Juan”.
Flores informou que o obxectivo para o próximo ano é que esta Unidade de Rescate en Litoral este presente naqueles eventos multitudinarios que poidan ter un risco engadido como a noite deSan Juan, a Batalla Naval ou o Noroeste Pop Rock e tamén nas alertas meteorolóxicas por fenómenos costeiros que requiran especial vixilancia. “Esta Unidade demostrou que ten capacidade para actuar cando hai un problema na franxa costeira urbana e agora se formula o reto de estar presente de forma preventiva naqueles eventos onde poida haber algún risco especial para actuar de inmediato e previr accidentes nas praias urbanas” indicou Flores.
O tenente de alcalde agradeceu o compromiso do SEIS á hora de impulsar esta actividade pioneira e apuntou que o Goberno municipal garante a formación especializada dos membros desta unidade para os próximos catro anos e que en 2015 se van multiplicar por cinco as horas de prevención para desenvolver a tarefa desta unidade especializada e ademais incrementar as charlas en colexios, os simulacros e os reténs preventivos en eventos deportivos e de ocio.
“Este ano xa solicitamos os medios materiais para desenvolver esta tarefa e completarémolos o próximo ano, os bombeiros teñen a motivación necesaria para adquirir a cualificación que se precisa para facer realidade esta especialización do SEIS e ademais están operativos as 24 horas ao día os 365 días do ano, está garantida a formación teórica e práctica de forma continua e vanse incrementar as horas de prevención”, destacou e finalizou: “Polo tanto, temos todos os elementos necesarios para que este novo servizo ao cidadán se desenvolva con éxito nos próximos anos e que poidan colaborar co resto de servizos de rescate acuático, que acolleron esta iniciativa de forma positiva, xa que esta Unidade de Rescate en Litoral do SEIS pode ofrecer unha resposta rápida, tanto en dispositivos preventivos coma en actuacións reactivas ante as emerxencias que se poidan producir na costa urbana,”.
