Máis de medio cento de persoas participaron na concentración convocada diante da casa consistorial
Os máis de trescentos alumnos e alumnas do CPI Cernadas de Castro de Lousame foron un ano máis os protagonistas das actividades programadas polo Concello de Lousame para conmemorar o 25 de novembro, Día Internacional contra a Violencia de Xénero. Uns actos presididos pola concelleira de Igualdade, Silvia Agrafojo, e pola directora do colexio, Pilar Cobas. Agrafojo salientou “a importancia da educación en igualdade como ferramenta básica para previr comportamentos e actitudes machistas entre o alumnado, tal e como ismo poder ver no vídeo que se vai proxectar a continuación”.
A mañá comezou con dúas proxeccións do vídeo “Engánchate ao bo trato”, que recolle o traballo realizado polo alumnado nos obradoiros do “Programa de sensibilización en igualdade e prevención da violencia de xénero”, financiado pola Secretaría Xeral da Igualdade e do Ministerio da Presidencia, Relacións coas Cortes e Igualdade. En total, durante os últimos meses desenvolvéronse catro obradoiros, de seis sesións cada un:
– “Que facemos na Rede” para Primaria e Secundaria, onde analizaron os riscos aos que se expoñen na Internet e a importancia da seguridade e de saber que información comparten
– “Engánchate ao bo trato”, dirixido a 6º de Primaria e 1º da ESO no que traballaron aspectos como a empatía, as estratexias para afrontar o conflito e como desenvolver unha comunicación eficaz
– “Entendámonos”, tamén para 6º de Primaria e 1º da ESO no que falaron sobre o autocoñecemento e na promoción da confianza nun mesmo para fomentar así o respecto á diversidade e aos demais
– “Como te ves?”, para o alumnado de Secundaria, no que traballaron a imaxe que teñen deles e delas e como pensan que os ven os demais, analizando cuestións como os estereotipos de xénero e os ideais de beleza nos medios de comunicación e na publicidade.
Rematada a proxección do vídeo, o alumnado desprazouse ao corredor principal do colexio, onde estaba emprazado o “Xardín da lembranza”. Aló, os nenos e nenas de Lousame plantaron flores co nome das vítimas da violencia machista deste ano xunto a outras palabras nas que expresarán os seus sentimentos diante desta lacra social.
Concentración
Rematado o acto no colexio, ás 13:30 horas tivo lugar unha concentración contra a violencia de xénero diante da Casa Consistorial de Lousame, que estivo presidida pola alcaldesa, Teresa Villaverde, e na que participaron traballadores municipais, persoal do centro de saúde, integrantes do obradoiro de emprego Noia-Lousame e veciños e veciñas que se achegaron ao lugar.
A concelleira de Igualdade, Silvia Agrafojo, deu lectura a un manifesto no que destacou que “o Concello de Lousame quere amosar o seu firme compromiso contra a violencia de xénero, a manifestación máis cruel e inhumana da desigualdade existente entre mulleres e homes. Combater calquera forma de violencia de xénero, física, psicolóxica, económica, sexual (que inclúe abusos, acoso e a trata de mulleres e nenas) debe ser unha cuestión de Estado”.
