O delegado territorial destacou que a participación xuvenil conleva o desenvolvemento de valores moi positivos, como son o traballo en grupo, a responsabilidade, a comunicación, o sentido da iniciativa e a autoconfianza
O delegado territorial da Xunta de Galicia na Coruña, Ovidio Rodeiro, visitou hoxe a Asociación Amicos, que está executando un proxecto de voluntariado xuvenil no que participan oito mozos e mozas, que ten como obxectivos o apoio para a integración social e rehabilitación de mozas con discapacidade intelectual.
Ovidio Rodeiro agradeceu aos participantes o seu esforzo voluntario e animounos a continuar desenvolvendo proxectos deste tipo, “xa que a participación xuvenil conleva o desenvolvemento de valores tremendamente positivos, como son o traballo en grupo, a responsabilidade, a comunicación, o sentido da iniciativa e a autoconfianza”.
O delegado tamén quixo destacar que o Voluntariado Xuvenil da Xunta foi o primeiro programa en toda España en apostar polo compromiso social directo da mocidade e que, ademais, “os participantes reciben unha certificación oficial da experiencia adquirida a través do voluntariado, algo cada vez máis valorado polas empresas no momento de optar a un posto de traballo”.
O Diario Oficial de Galicia (DOG) do pasado día 15 publicou a resolución desta orde, mediante a cal a Consellería de Política Social financia 73 programas de acción voluntaria en concellos e entidades vinculados á promoción do voluntariado xuvenil, 35 deles na provincia da Coruña.
O Goberno galego destina 405.000 euros para que as entidades e concellos poñan en marcha estes proxectos, que están protagonizados por mozas e mozos galegos de idades comprendidas entre os 16 e os 30 anos e que teñen lugar entre o 1 de xaneiro e o 31 de outubro deste ano. Do importe total desta convocatoria, 195.000 euros están destinados ás actividades de concellos e 210.000 para as entidades de acción voluntaria. Das 73 axudas concedidas, 44 son a entidades, 27 a concellos e dúas son concesións conxuntas.
Fináncianse actividades relacionadas co Camiño de Santiago; coa recuperación da cultura, o arte e as tradicións populares galegas; actividades con colectivos en situacións de risco; iniciativas destinadas á mocidade, relacionadas coa igualdade de xénero; coa posta en valor do medio rural; destinadas ao benestar das persoas maiores e a posta en marcha de programas de voluntariado no ámbito familiar por parte de entidades. A elas súmaselles este ano as accións relacionadas co Pacto de Estado en materia de violencia de xénero.
