Xosé Sánchez Bugallo recibiu esta mañá na Casa do Concello á Ministra de Industria, Comercio e Turismo en funcións, Reyes Maroto. Despois de asinar no Libro de Ouro da cidade, mantiveron un breve encontro no que o alcalde lle pediu unha implicación “máis directa do seu Ministerio na programación e na xestión do Xacobeo”. A ministra explicou que están traballando co obxectivo de vertebrar un proxecto en torno ao Ano Santo, e que se están activando “algúns programas en común” co Concello co obxectivo de poder “desfrutar todos dese gran evento, aproveitándoo como un reclamo turístico de promoción de Galicia e da marca España”.
Despois de agradecerlle a súa presencia no Concello, Sánchez Bugallo afirmou que tanto o Ministerio de Turismo como o Goberno de España xa “están detrás” do Ano Santo en materia orzamentaria e de seguridade, pero “non se visualiza dende o punto de vista da súa participación indirecta e dende a súa intervención activa”. O alcalde lembrou que o Camiño de Santiago é común a moitas das comunidades autónomas e polo tanto é dixo, un tema transversal. Sinalou que se trata “dunha das referencias internacionais máis sólidas e máis lonxanas no tempo” que ten España e que dentro de dous anos se cumpren, dixo, os 900 anos da proclamación do Ano Santo polo Papa Calixto II. Unha institución, subliñou en referencia á ruta xacobea, que é común a “todos os países de Europa, dende Finlandia ou Islandia ata Turquía. En todos os países europeos hai Camiños de Santiago”.
En materia de Turismo, a conversa centrouse, segundo a ministra, “en poder aportar unha maior presenza e proactividade” nun proxecto “tan importante” como vai ser o Xacobeo 2021. Reyes Maroto trasladoulle a Sánchez Bugallo que na última conferencia sectorial do Ministerio aprobaron un grupo de traballo para coordinar accións de promoción e de dixitalización dos Camiños de Santiago “para facer do Xacobeo un proxecto vertebrador de España”. Este grupo, dixo, “estase reunindo hoxe en Fitur”. E adiantou que en xaneiro de 2020 “presentaremos ese proxecto no que se está traballando”.
Explicou tamén a ministra que, en resposta “a esa proactividade que o alcalde nos está solicitando”, por primeira vez Turespaña está participando como convidado no Consello Xacobeo, para poder incorporar accións de promoción ao Ano Santo. Este consello, que “ten participación do Ministerio de Cultura”, é onde se organizan todas as actividades culturais en torno ao Xacobeo 2021.
“Será un proxecto”, explicou Reyes Maroto, onde o Goberno e o Ministerio “se impliquen de forma moi activa”. Afirmou que os datos de turismo “anímannos a seguir traballando” e citou as cifras sobre turismo do segundo trimestre da EPA (Enquisa de Poboación Activa) que se publicarán mañá. Explicou que “para Galicia son moi bos”. Adiantou, en concreto, os datos de emprego no sector turístico, “cun dinamismo en canto a crecemento interanual dun 3,7%, por enriba da media do conxunto de España e cun volume de emprego que xa supera os 127.000 ocupados”.
Reyes Maroto tamén destacou a implicación do Ministerio con outros proxectos, como España Verde. “Recentemente reuniuse a secretaria de Estado con representantes das catro comunidades autónomas para realizar unha campaña de promoción internacional”, indicou.
Sinatura no Libro de Honra
No acto de sinatura do Libro de Honra de Santiago tamén estiveron presentes o delegado do Goberno en Galicia, Javier Losada, e o concelleiro de Relacións Institucionais, Sindo Guinarte. Reyes Maroto escribiu que era unha honra estar nunha cidade como Compostela e conversar con representantes do Concello sobre temas de gran relevancia para a cidade, como o turismo e, en particular, o Xacobeo. E remataba ofrecendo a colaboración do Ministerio de Industria para que o turismo “sexa unha panca de xeración de riqueza e emprego para a cidade e os seus veciños”, comprometéndose a colaborar nos “proxectos de desenvolvemento dun turismo sostible e inclusivo”.
