Está dirixida a hostaleiros, comercios e empresas do municipio
A Asociación de Empresarios de Riveira aliouse co Concello no obxectivo de lanzar unha nova iniciativa pensada para axudar a que ningún veciño se quede sen Nadal. O seu nome, “Nadal solidario, Nadal para tod@s”.
O presidente do colectivo empresarial, Antonio Miranda, e o alcalde Manuel Ruiz, presentaron conxuntamente esta acción, consistente en que todos os comercios, hostaleiros e empresas do municipio que se sintan interesados (con independencia de que sexan socios ou non da entidade e de Viamare) doen alimentos, roupa, xoguetes ou unha achega económica para seren repartidas entre as familias máis necesitadas a través das ONGs do noso termo municipal.
Distintivo
Todos os que se acollan a esta campaña lucirán nas súas sedes ou locais (nas portas principais, escaparates, etc…) un cartel ou distintivo que informe da súa participación na actividade solidaria.
A Asociación de Empresarios é a encargada de xestionar a iniciativa. Antonio Miranda fixo un chamamento para que tanto os comercios como as ONGs interesadas se poñan en contacto coa patronal, ben a través do teléfono 981 873 719 ou ben mediante o enderezo electrónico correo@empresariosriveira.com.
Comezará a funcionar o día 15 de decembro e rematará o día 5, podendo realizarse a doazón tanto durante a campaña como unha vez conclúa a súa posta en marcha.
Ruiz Rivas loou esta acción, que comparte os obxectivos perseguidos polo Concello de ofrecer un Nadal no que a solidariedade brille por encima de todo. A este respecto, o alcalde riveirense citou numerosas actividades incluídas este ano na programación navideña, como festivais solidarios, un taller de fotografía no que os participantes formalizarán a súa inscrición a través da doazón de cinco quilos de alimentos ou a reserva do 10% das prazas de todos os obradoiros e espectáculos infantís para familias implicadas en programas de apoio social.
Así mesmo, informou de que co obxecto de seguir incentivando o comercio local habilitarase no poboado navideño da praza de España un servizo de ludoteca. Estará funcionando os sábados 27 de decembro e 3 de xaneiro e os mércores 24 e 31 de xaneiro.
Pista de xeo
Por outra parte, Antonio Miranda agradeceu ao Concello de Riveira que este ano asumise a xestión de traer a Riveira unha pista de xeo e informou de que a asociación que preside porá a disposición dos socios que así o demanden un total de 4.000 bonos de desconto. Tamén tivo palabras de gratitude para a empresa Oziona e para as empresas que colaboraron na posta en funcionamento da referida instalación.
