Tivo lugar un showcooking na Praza de Abastos de Ordes, da man da cociñeira Karina Carreira, do Factoría Doce. Sardiñas con pementos á brasa, mexillóns en escabeche ou champiñóns de mar foron as receitas que o público puido degustar.
A cita englóbase dentro da campaña ‘Quere o teu mercado’, lema en galego da Campaña Internacional dos Mercados (www.quereoteumercado.gal), promovida pola Xunta de Galicia en colaboración cos concellos, as prazas de abastos e as federacións e asociacións de comerciantes. Como obxectivo principal está o de destacar o papel dos mercados, potenciar a compra do produto local e dar a coñecer o traballo de praceiros e praceiras.
