Avoga por continuar co traballo conxunto coas entidades para ofrecer mellores servizos e achegar solucións ante unha realidade que afecta a preto de 40.000 galegas e galegos
A conselleira de Política Social, Fabiola García, avogou hoxe por dar maior visibilidade e avanzar na mellora do benestar das persoas con Dano Cerebral Adquirido (DCA) e das súas familias. Fíxoo na inauguración das terceiras xornadas sobre esta doenza que organiza a Fundación María José Jove e a Asociación de Dano Cerebral Adquirido da Coruña (Adaceco).
Durante a súa intervención, Fabiola García salientou a importancia que teñen este tipo de encontros para poñer en común experiencias e concienciar á poboación en xeral sobre unha realidade que afecta a preto de 40.000 galegas e galegos. Neste sentido, sinalou que o DCA chega de maneira repentina e cambia a vida non soamente das persoas afectadas senón de toda a familia, polo que reiterou o compromiso da Xunta para que sempre estean apoiadas e teñan as súas necesidades cubertas.
A conselleira tamén garantiu o apoio ás entidades sociais que traballan ao carón das persoas con DCA a pé de campo e os 365 días do ano, co obxectivo de traballar para ofrecer os mellores servizos, tanto no eido da saúde como no campo das políticas sociais. Nesta liña, marcou como obxectivo prioritario a mellora da calidade de vida destas persoas e achegar solucións que lles fagan o día a día máis sinxelo.
