O Concello de Santiago fará entrega esta tarde das súa máis alta distinción, a Medalla de Ouro da Cidade, ao empresario José Otero e á agrupación Cantigas e Agarimos. Será nun acto que presidirá o alcalde no Hostal dos Reis Católicos, e no que Ramón Castromil recibirá ademais o título de Fillo Predilecto de Compostela.
Tal e como acordou o Pleno da Corporación no pasado mes de xullo, o Concello faralle entrega esta tarde da Medalla de Ouro da Cidade a José Otero. Con esta distinción, recoñécese o servizo á sociedade da Fundación creada polo empresario e pola súa esposa, Carmela Martínez, que sostén numerosas obras sociais, educativas e culturais. Entre elas, destaca a doazón dunha residencia xeriátrica no barrio compostelán de Pontepedriña, que sumou 150 prazas públicas para atención a maiores dependentes galegos, e que leva os nomes de José Otero e Carmela Martínez.
Ademais, no acto desta tarde recibirá unha segunda Medalla de Ouro a agrupación Cantigas e Agarimos, cando está a piques de celebrar o seu centenario. A entidade cultural é merecedora da distinción polo seu incansable labor de custodia do folclore galego, tanto na recuperación e conservación da música e o baile tradicional como na súa transmisión ás novas xeracións. Pola agrupación, que mudou a súa sede histórica da Algalia polo barrio do Castiñeiriño, teñen pasado xa case 3.000 alumnos e alumnas. Xunto con esta distinción, o Pleno da Corporación acordara outorgarlle cadansúa mención especial ás outras agrupacións folclóricas máis asentadas na cidade: Brincadeira, Colexiata de Sar e Ultreia.
Fillo predilecto
Por último, cumprindo tamén o mandato da Corporación municipal, hoxe recollerá a distinción de Fillo Predilecto de Santiago Ramón Castromil. O Concello quixo recoñecerlle os seus méritos como terceira xeración da empresa Castromil, a que el quixo galeguizar e utilizar como transmisora da cultura. Tamén se pon de relevo o seu papel como pianista, profesor do Conservatorio e académico numerario da Real Academia Galega de Belas Artes.
As persoas e entidades recoñecidas hoxe recibirán unha medalla, unha insignia e un pergamiño elaborado pola pergamiñista Susana Vázquez Pereira.
