Pouco a pouco distintos lugares da vila de Ordes van presentando un novo aspecto a medida que os murais da nova entrega do DesOrdes Creativas van tomando forma. A piscina climatizada é o lugar de traballo para Minia Regos, a N-550 á altura das Casillas e á saída da vila son os de Lidia Cao e Animalito respectivamente, mentres que na rúa Lagartos pódese atopar a Miguel Peralta. Organizado polo colectivo Mutante esta undécima edición engloba artistas tanto de Galicia como de Arxentina e Almería
Paralelamente desenvolveranse toda unha serie de actividades e citas dirixidas ao público interesado na arte urbana.
• Mércores, 8 de agosto, durante todo o día, Mon Devane ofrecerá na alameda unha exhibición de grafito.
• Xoves e venres, 9 e 10 de agosto, de 10 a 14 e de 16 a 20 horas Mon Devane ofrecerá de balde unha master class sobre o retrato con aerosol. As persoas interesadas deberán incribirse ata o vindeiro martes a través do correo electrónico info@mutantecreativo. Nel deberán indicar os seguintes datos: Master Class con Mon Devane (asunto); nome e apelidos; teléfono e mail de contacto; formación e link a portfolio, instagram, web, blog, etc.
• Obradoiro gratuíto de pintura mural para nenos e nenas de 6 a 12 anos. Sábado día 11, de 10 a 14 e de 16 a 20 horas. Inscricións ata o xoves día 9 a través do correo electrónico info@mutantecreativo. Deberán indicar os seguintes datos: Obradoiro con Iria Fafian; nome, apelidos e idade; teléfono e email de contacto do pai, nai ou titor.
• Exhibición de celograff con Nove Noel. Parque da Constitución, o sábado día 11, durante todo o día.
• Roteiro guiado e de balde para ver os murais de edicións anteriores. Sábado día 11 de 19 a 21 horas. Saída dende o parque da Constitución.
Ademais de todo isto tamén o sábado, a partir das 22 horas, no parque da Constitución terá lugar unha nova entrega do festival DesOrdes Sonoras. Unha cita musical que traerá ata Ordes ás seguintes bandas: Hermanos L, Boyanka Kostova, Mounqup, SSSSekone.
Organizado polo Concello de Ordes esta iniciativa está cofinanciada pola Deputación da Coruña, patrocinada por pinturas Proa e Loxam Hune. Tamén conta coa inestimable colaboración de Mutante (arte, deseño e comunicación).
