E-Dixgal estará presente nun total de 91 colexios e institutos coruñeses, un 72% máis que o ano pasado
Un total de 38 novos centros sostidos con fondos públicos da Coruña incorporarán o libro dixital nas súas aulas por primeira vez o próximo curso 2018/19, polo que o proxecto de educación dixital, E-Dixgal, acada os 91 centros beneficiados en toda a provincia, un 72% máis que o ano pasado. Todos eles -estudantes de 5º e 6º curso de Primaria e 1º e 2º de ESO- recibirán unha ensinanza completamente dixital.
A Consellería de Cultura, Educación e Ordenación Universitaria vén de publicar a resolución definitiva –que se pode consultar neste enlace http://www.edu.xunta.gal/portal/sites/web/files/resolucion_edixgal_definitiva.pdf– na que se dan a coñecer os centros E-Dixgal para este novo curso. En toda Galicia, son 114 os novos centros adheridos ao proxecto, que xa chega a 267 en total (un 70% máis que o curso pasado) e 18.000 alumnos, un 55% máis.
Listaxe de novos centros incorporados ao libro dixital na provincia da Coruña:
Nome do centro Concello Etapa educativa
CPI As Mirandas Ares
Educación Primaria
CPR Plurilingüe Nuestra Señora del Carmen Betanzos
CEIP Wenceslao Fernández Flórez Cambre
CEIP Portofaro Cambre
CEIP Gonzalo Torrente Ballester Cambre
CEIP Cruceiro de Canido Ferrol
CEIP de Recimil Ferrol
CEIP Manuel Masdías Ferrol
CEIP Almirante Juan de Lángara y Huarte Ferrol
CEIP de Esteiro Ferrol
CEIP A Laxe Ferrol
CEIP Ponzos Ferrol
CEIP Plurilingüe O Ramo Fene
CEIP de Caión A Laracha
CPI Plurilingüe Cernadas de Castro Lousame
CEIP de San Ramón Moeche
CEIP Felipe de Castro Noia
CEIP de Sigüeiro Oroso
CEIP de Oza dos Ríos Oza-Cesuras
CEIP Ramón Cabanillas Santiago de Compostela
CEIP Plurilingüe Monte dos Postes Santiago de Compostela
CEIP Bergantiños Carballo
CEIP Santa Baia Boiro
CEIP Os Tilos Teo
CEIP Plurilingüe A Fraga As Pontes
CEIP Isaac Díaz Pardo Culleredo
CPR Nuestra Señora del Rosario Arzúa
Educación Primaria e Secundaria
CPI Armando Cotarelo Valledor Boimorto
CPI Alcalde Xosé Pichel Coristanco
CPI Plurilingüe de Vedra Vedra
IES de Catabois Ferrol
Educación Secundaria
IES Saturnino Montojo Ferrol
CPI de Xanceda Mesía
IES As Telleiras Narón
IES Campo de San Alberto Noia
IES de Cacheiras Teo
IES As Insuas Muros
IES Poeta Añón Outes
Estes datos mostran o forte impulso que o departamento educativo da Xunta de Galicia, en colaboración coa Axencia para a Modernización Tecnolóxica de Galicia (Amtega), vén de realizar no E-Dixgal. O proxecto naceu como experimental no curso 2014/15 coa intención de proporcionarlle aos centros da rede Abalar un proxecto integral para facilitar o desenvolvemento de proxectos de educación dixital mediante a incorporación de materiais específicos. Deste xeito, no vindeiro curso, o 27% dos centros de ensino obrigatorio públicos contan con proxectos de educación dixital, 17 puntos porcentuais máis que no curso 2014/15, cando arrancou esta iniciativa con carácter experimental e que agora se consolida.
Unha vez finalizado o carácter experimental do proxecto, e consolidado no seu procedemento, optouse por darlle un novo impulso mediante a súa ampliación, así como flexibilizando algúns dos requisitos. Deste xeito, na convocatoria deste ano reforzouse o proxecto en ESO cun plantexamento máis flexible e adaptable, posto que require un mínimo de seis materias no modelo dixital, mentres que ata agora se incluían todas as materias na iniciativa.
Tamén cómpre lembrar que, ata o momento, para acceder a este programa era necesario que os centros participaran no proxecto Abalar. A partires de agora subminístrase o equipamento informático necesario –fundamentalmente ultraportátiles para os alumnos– aos centros que non conten con el. De feito, a Xunta de Galicia realizou este ano a renovación dos equipos dos centros E-Dixgal, o que supuxo o reparto de máis de 13.000.
Edudixital 2020
Continúase así co despregamento do libro dixital no ensino galego, enmarcado na Estratexia galega para a educación dixital (Edudixital 2020). Algúns dos obxectivos deste plan son lograr que todo o alumnado do ensino obrigatorio teña formación en robótica e programación no curso 2020/21, romper coa fenda de xénero nos estudos STEM e acadar os 300 centros e máis de 20.000 alumnos beneficiados co libro dixital no 2020/21.
Cómpre lembrar que os centros que se incorporan este curso poderán beneficiarse desde o inicio das novidades do programa, tales como a incorporación dun novo provedor de contidos, aulaPlaneta, que se sumou a Netex e Edebé. Ademais, estará dispoñible o centro de produción, que facilitará aos docentes novas ferramentas e mecanismos para que poidan incorporar á plataforma contidos educativos innovadores. E tamén está en proceso de licitación o contrato dun novo provedor de contidos en inglés.
Tamén neste curso se activará o Servizo de Soporte Premium para as familias, alumnado e profesores dos centros educativos implicados na iniciativa, que ofrecerá tres tipos de asistencia: remota (telefónica e online); in situ, con desprazamento ao lugar do incidente, e a través de puntos físicos de atención.
Os máis de 1.500 profesores, 18.000 alumnos e as súas familias dispoñerán dunha única vía de atención para todas as cuestións relacionadas co uso do libro dixital a través de varias canles (teléfono, correo electrónico, web, app no móbil…), as 24 horas do día os sete días da semana. O novo servizo contempla, como novidade, que o soporte se preste no domicilio da familia ou o docente para aqueles incidentes que requiran unha atención presencial.
Plan de formación propio
Cómpre lembrar, ademais, que o E-Dixgal vai máis aló do mero equipamento informático. De feito, todos os centros contan cun plan de formación propio no ámbito das novas tecnoloxías, cunhas 2000 horas de formación específica para o profesorado.
Para o vindeiro curso 2018/19, ademais deste plan, en todos os Centros de Formación e Recursos (CFR) e no CAFI realizaranse cursos presenciais de iniciación e de profundización no manexo da contorna EVA E-Dixgal dirixida a todo o profesorado. Levaranse a cabo tamén diversas xornadas de actualización pensadas para aquelas persoas que realizan as funcións de coordinación do proxecto E-Dixgal nos centros educativos.
Ademais, ditos plans incorporan unha Escola de Nais e Pais para que as propias familias reciban información ao respecto e dispoñan de canles axeitadas para o acceso aos contidos e a resolución de dúbidas, entre outros.
