O Concello investirá 43.000 euros nos traballos, que se executarán no prazo dun mes
O Concello da Coruña, a través da Concellaría de Infraestruturas que dirixe Martín Fernández Prado, informa da próxima renovación do firme na rúa traseira de Enrique Mariñas, no barrio de Matogrande.
A pesar de encontrarse nunha zona de recente urbanización, esta vía presenta un estado moi deteriorado debido, en boa medida, á elevada cantidade de tráfico diario que soporta, especialmente de vehículos de repartición. Por este motivo, o Goberno local, dentro da súa aposta polo mantemento dos barrios da cidade, acometerá a renovación de pavimento deste vial.
Cun prazo de execución dun mes e un presuposto de 43.387,49 euros, os traballos consistirán no reforzo do firme deteriorado cunha capa de 5 centímetros de espesor e fresado de firme e reposición da capa de rodadura de 5 centímetros nas zonas máis deterioradas. Ademais poñeranse a cota as tapas de rexistro de pozos, arquetas e sumidoiros. No último tramo do vial renovarase a rede de sumidoiros que se encontra en estado deficitario.
Con este conxunto de actuacións, o Concello pretende conseguir que o vial recupere o seu estado orixinal e estea en perfectas condicións para os usuarios habituais desta rúa.
