Os interesados terán 30 días hábiles para presentar alegacións, suxestións ou observacións e a Xunta solicitaralle informes aos organismos afectados
A Consellería de Medio Ambiente e Ordenación do Territorio vén de someter a información pública a solicitude de autorización ambiental integrada para unha planta de recepción e pretratamento de residuos de buques no Porto da Coruña. Coa publicación do anuncio hoxe no DOG, os interesados terán 30 días a contar desde mañá para presentar alegacións ao proxecto, promovido por Limpieza marítima de óleos (Limpoil).
Cómpre lembrar que o pasado mes de outubro a Consellería de Medio Ambiente formulou o informe de impacto ambiental dentro do procedemento de avaliación de impacto ambiental simplificado sobre esta planta, ao considerar que non era necesario tramitar o proxecto pola vía ordinaria.
Durante o trámite de información pública que se abre agora, solicitaranse informes sectoriais á Consellería de Economía, Emprego e Industria, á Autoridade Portuaria da Coruña, a Augas de Galicia, ao Laboratorio de Medio Ambiente e ao Concello de A Coruña.
Unha vez pechado o período de consultas, valoradas as alegacións, suxestións ou observacións realizadas ao proxecto, e recibidos os informes definitivos dos diferentes organismos públicos, o órgano ambiental ditará a resolución que porá fin ao procedemento.
Obxectivo
Nestes momentos, a empresa Limpoil conta xa con licencia para a prestación de servizos de recollida de residuos líquidos e sólidos procedentes de buques no Porto da Coruña. Sen embargo, non os somete a pretratamento dentro das instalacións portuarias, senón que os traslada para que sexan tratados noutro lugar.
O proxecto para o que Limpoil solicita agora Autorización Ambiental Integrada pretende instalar no porto unha planta con capacidade para recibir os residuos dos buques, almacenalos e sometelos a un tratamento físico-químico para separar a auga do aceite. Tras este proceso, as augas xa tratadas verteranse na rede de saneamento municipal e os restos oleosos trasladaranse en camións cisterna a unha planta de tratamento autorizado.
Esta nova instalación, pensada para prestar servizo unicamente aos barcos que atraquen na Coruña, permitiría someter os residuos xerados a un pretratamento no propio porto, evitando así ter que transportar fóra unha gran cantidade de auga.
