Conta con máis de 600 metros de nova pavimentación sen barreiras arquitectónicas. Dende finais do ano realizáronse traballos na rede de abastecemento, ademais de colocar arquetas, valvulería e canalizacións para a iluminación. O orzamento total ascendeu a algo máis de 125.000 €, aos que hai que sumar outros 17.500 € para o aglomerado e pintado da vía
O Concello de Ordes vén de rematar a construción das novas beirarrúas na Rúa Nova. Trátase de 610 metros lineais (265 por ambas as marxes), a última execución que se realizou nesta céntrica rúa da vila ordense dentro dun proxecto integral que atende a varios servizos.
Concretamente trátase de tramos de 1,80 metros de ancho, ademais doutros 10 treitos de 8 metros de lonxitude e 2 metros de ancho. A nova infraestrutura, que salva todo tipo de barreiras arquitectónicas para persoas con mobilidade reducida, presenta bordos de granito e baldosas de formigón granallado. Para executar correctamente esta intervención foi necesaria a demolición do pavimento existente debido ao seu deficiente estado, ademais da eliminación e posterior recolocación dun muro. O concello tamén instalou bancos en diversos puntos.
O investimento para este proxecto que se iniciou a finais do ano pasado supera os 125.000 €, os cales se sufragarán co remanente rexistrado no exercicio do ano 2016.
A totalidade do proxecto incluíu a canalización de 567 metros de tubaxes de polietileno, dos que 530 son de 90 mm de diámetro e 10 atm de presión (os restantes de 40mm e 10 atm). Tamén se dotou da correspondente valvulería e arquetas de aloxamento para abastecemento de auga potable, así como a canalización de 530 metros de tubo de polipropileno destinado á iluminación pública.
Asfaltado
Nas vindeiras datas o Concello de Ordes ten previsto o asfaltado e o pintado da estrada que se sitúa nesta rúa. O orzamento para esta obra ascende a algo máis de 17.500 euros.
