García agradece o apoio a uns orzamentos “sociais e esperanzadores, dos que nos podemos sentir orgullosos despois de bastante tempo”
A unanimidade foi a protagonista na sesión plenaria ordinaria de hoxe en Brión pois todos os puntos da orde do día, incluída a aprobación dos Orzamentos Municipais para 2018, foron aprobados co voto a favor de todos os grupos municipais. Así, o pleno aprobou os Orzamentos Municipais para 2018, que ascenden a 6.143.472,94 euros, destinan máis de 850.000 euros a investimentos e rexistran importantes subidas en materia de servizos sociais e promoción do emprego.
O alcalde, José Luís García, explicou que “son uns orzamentos sociais e esperanzadores, os primeiros dos que nos podemos sentir orgullosos despois de bastante tempo”. Neste sentido, o alcalde brionés salientou que os Orzamentos de 2018 “caracterízanse polo seu importante contido social e inversor, pois axudan aos máis necesitados, contribúen a crear emprego e a dar mellores servizos aos nosos veciños e veciñas”.
Emprego
Así, o gasto en servizos sociais medra nun 16%, pasando dos 440.460 euros de 2017 ao 511.037 euros de 2018. Así mesmo, García indicou que “un dos problemas máis importantes que segue habendo a nivel de Estado é o paro, por iso para promoción do emprego pasamos de 26.600 euros a 157.774 euros, so coa parte do Concello, pois non contamos as achegas da Deputación a través de programas como o Plan de Emprego Local”. “Isto, unido á creación dun espazo colaborativo para o 2018 fan que manexemos unhas cifras realmente alentadoras que facilmente suporán un incremento do 400%”.
O alcalde brionés tamén apuntou que “se aumentan as subvencións ás asociacións de contido deportivo e social” mentres que a partida de investimentos “alcanza en 2018 unha cifra superior aos 850.000 euros, o que representa unha subida de case o 23% con respecto ao ano anterior”. En concreto, o capítulo de investimentos ascende a 850.534,63 euros, un 22,78% máis cos 692.738,79 euros de 2017.
Un capítulo no que destacan proxectos financiados pola Deputación da Coruña, entre eles as melloras nas aldeas de Vilanova e Estrar, a conexión da rede de abastecemento de auga da Luaña coa rede xeral ou a substitución da cuberta do pavillón polideportivo de Pedouzos. Do total do capítulo, 351.563,72 euros son financiados a través de recursos propios do Concello de Brión.
Gastos e ingresos
O último punto no que fixo fincapé García foi no capítulo de gasto de persoal, que medrará un 2%, “porcentaxe que esperamos que o Goberno nos deixe subir na mesma porcentaxe que os Orzamentos do Estado establezan”. Así mesmo, o alcalde adiantou que “está en elaboración a Relación de Postos de Traballo dos laborais e a subida que representa calculamos que poderá entrar en vigor a mediados de ano”. Os gastos de persoal suman 2.157.481,07 euros, fronte ao 5.183.409,04 euros de 2017.
O Capítulo II (gastos correntes en bens e servizos) medra un 0,65% ata os 2.483.212,86 euros; mentres que o Capítulo III (gastos financeiros) diminúen considerablemente (un 81,05%) como consecuencia da amortización total dos préstamos con entidades financeiras que se levou a cabo no exercicio 2017. As transferencias correntes medran un 12,33% ata os 615.335,38 euros, cuxa maior parte vai destinado a facer fronte aos compromisos adquiridos como membro da Mancomunidade Serra do Barbanza, así como os mencionados incrementos nas subvencións educativas, deportivas, sociais, axudas de emerxencia, axudas á escolarización e ao pago de medicamentos a enfermos crónicos.
Finalmente, no capítulo de ingresos os impostos directos diminúen nun 8,71% mentres que os indirectos se prevé que medren un 16,88% grazas ao aumento dos ingresos polo Imposto sobre Construcións Instalacións e Obras. O capítulo II (taxas e prezos públicos) redúcese nun 0,93%. As transferencias correntes baixan un 4,96% e no capítulo VI recóllese o alleamento dunha parcela municipal. Para este exercicio non está prevista ningunha operación crediticia.
Apoio da oposición
O voceiro do Partido Popular, David García Arcos, xustificou o voto favorable da súa formación en que “aumenta o gasto social e en emprego. Son uns orzamentos bastante bos e manteñen a estabilidade orzamentaria”. Pola súa banda, o voceiro do BNG, José Luís Penas Corral, considerou que son “uns orzamentos que poden ser votados en positivo” e valorou “o crecemento en partidas sociais e que se poñan as rodas do futuro auditorio, que é algo que nos alegra”.
O alcalde brionés agradeceu o voto favorable dos dous grupos municipais e anuncioulles que “o remanente de tesourería do Concello de Brión é de case 2 millóns de euros, sen estar aínda pechado o resultado do orzamento do 2017” e convidou aos dous grupos municipais a unha reunión para ver que se pode facer con ese remanente. “Non sei se poderá ir aquí o auditorio pero a nosa intención é poñer en marcha este proxecto canto antes, pois é algo que nos quedaba por ofrecer aos nosos veciños e veciñas”, explicou José Luís García.
Día de Rosalía
No marco do bo ambiente xerado durante a sesión, o alcalde brionés ofreceu aos dous grupos da oposición a posibilidade de presentar de xeito conxunto unha moción para declarará o 24 de maio como Día de Rosalía no Concello de Brión. Unha data que se conmemorará cun imporante programa de actividades que comeza hoxe mesmo, co contacontos “Contando con Rosalía” da man de Marisa Irimia”, e continuará este sábado 24, ás 17:00 horas, cunha visita teatralizada que “Os Quinquilláns” farán no adro da igrexa parroquial de Bastavales. Un programa de actividades que tamén se levará aos colexios con dúas homenaxes a Rosalía: o 2 de marzo no CEIP de Pedrouzos e o 20 de marzo no IES de Brión, nos que o alumnado fará unha pequena ruta pedestre dende o alto do Monte Rubial ata o adro de Bastavales e que tamén contará coa actuación de “Os Quinquillán”.
Así mesmo, na fin de semana do 24 de febreiro, o Concello de Brión participará no “Caldo de Gloria”, unha homenaxe a Rosalía degustando un tradicional caldo galego como tapa nos establecementos: BTV, Hotel Casa Rosalía, Kratos e O Repouso. Así mesmo, repartiranse entre a veciñanza marcapáxinas, chapas, folletos e unha bolsa conmemorativa da campaña “As pegadas de Rosalía”.
Resto da sesión plenaria
O resto dos puntos da sesión saíron adiante por unanimidade. Así, o pleno apoiou un estudo de detalle para o reaxuste da alineación de dúas parcelas en Sabaxáns (Bastavales) e a actualización dos prezos da escola infantil municipal de acordo co IPC. Tamén se aprobou un recoñecemento extraxudicial de crédito de 20.992,48 euros para o pago de facturas correspondentes a 2017 pero que entraron no Rexistro nos últimos días de 2017 ou primeiros de 2018.
Finalmente, aprobouse unha corrección de erros nun proxecto do POS+2018. O primeiro era unha cifra que aparecía diferente en dous puntos (541,08 en vez do correcto 541,98 euros) e o segundo era no proxecto da cuberta do pavillón, que tiña un IVE do 16% en vez do 21%. O Concello de Brión asumirá esa diferenza do 5%.
