A comarca de Ordes é a terceira en produción de leite en Galicia, onde no concello ordense figuran 177 explotacións cunha cota asignada de 27,9 millóns de quilos
Os socialistas de Ordes presentarán no pleno municipal do vindeiro 27 de novembro unha batería de propostas para garantir a supervivencia das 177 explotacións de leite existentes en Ordes, sobre todo ante o risco que supón que o Goberno aínda non modificara o Real Decreto que aplica o “Paquete Lácteo” en España e tendo en conta que o sistema de cotas desaparecerá en 2015. Isto podería supoñer que as explotacións non terían garantida a recollida da súa produción xa que as industrias poden optar por recoller o leite a un menor número de granxas que incrementen as súas entregas ao non estar limitados pola cota láctea abandonen aquelas que lle resulten menos atractivas”, explica o voceiro municipal socialista, Xesús Pedreira.
O voceiro socialista denuncia que “os informes de situación da implantación do contrato obrigatorio no sector lácteo que publica o propio Ministerio de Agricultura demostran que en España non se está a cumprir a lei”. De feito, o último informe (xullo 2014) indica:
– que hai empresas que non asinan contratos (en concreto 1.980 produtores de leite en España, o 11,8% dos gandeiros en activo, están nesta situación)
– que non se cumpre a duración mínima dun ano (xa que a duración media é de 4,98 meses)
– que os contratos non son asinados antes da entrega do leite (o 24,63% dos gandeiros asinan os contratos un mes despois).
Ante esta situación, o Goberno ten previsto modificar o Real Decreto 1363/2012, de 28 de setembro, polo que se regula o recoñecemento das organizacións de produtores de leite e das organizacións interprofesionais no sector lácteo e se establecen as condicións de contratación (BOE 2-10-2012). “É fundamental que esta modificación entre en vigor na seguinte renovación dos contratos, é dicir, a que regule as entregas de leite a partires do 1 de xaneiro de 2015 para garantir estabilidade ao sector lácteo durante o primeiro ano de desaparición das cotas”.
Por iso, o PSOE de Ordes solicitará o apoio dos distintos grupos municipais para que nesa reforma se estipule que a duración mínima dos contratos será de 12 meses, que o volume subministrado polos produtores de leite será igual ao entregado nos 12 meses anteriores e que as empresas presenten aos gandeiros unha oferta por escrito cunha antelación de 1 mes respecto á data de entrada en vigor do contrato. Ademais, se solicitará a creación da figura do mediador dos contratos lácteos, de carácter independente e que poida intervir en caso de conflito; e a regulación da figura dos primeiros compradores de leite.
Así mesmo, os socialistas ordenses solicitarán da Xunta de Galicia a mobilización de terras agrarias para incrementar a superficie útil das explotación. “O obxectivo é incorporar 400.000 hectáreas no ano 2015 e tamén que se prohiban as plantacións forestais en terras agrarias, e que se vixíe que así sexa”, indica Xesús Pedreira.
Ordes, concello leiteiro
O sector lácteo é un dos sectores estratéxicos tanto de Galicia como de Ordes e a súa comarca. Así, Galicia achega á produción de leite de vaca en España o 56% dos produtores, o 40% das vacas leiteiras e o 39% das entregas de leite, sustentando uns 60.000 postos de traballo. Na comarca de Ordes, o peso do sector lácteo é moi importante, xa que é a terceira comarca en produción de leite en Galicia, con 1.067 explotacións e cunha cota de 223.963.852 quilos. Ordes é o terceiro concello da comarca que máis leite produce, só por detrás de Mesía e de Frades.
De feito, en Ordes están rexistradas 177 explotacións, cunha cota asignada de 27.954.427 quilos, o que supón unha cota media de 157.935 quilos por explotación. O censo da campaña 2012-2013 indica que en Ordes hai un total de 3.343 vacas de leite e 2.077 vacas de carne, facendo unha media de 12 vacas por explotación.
