O Concello inviste nestes traballos, que durarán tres meses, un total de 173.000 euros
O Concello da Coruña, a través da Concellaría de Infraestruturas que dirixe Martín Fernández Prado, informa do inicio da renovación de pavimento e outras melloras nos aparcadoiros das torres de
Os Mariñeiros, no barrio de Monelos.
Os traballos, cunha duración de 3 meses e un investimento de 173.030 euros, consisten na renovación de pavimento rodado, tanto en zonas de aparcadoiro coma de tránsito; a construción dunha nova rede de sumidoiros para a recollida de augas pluviais; en desprazar os farois que actualmente obstaculizan o paso de peóns; e no soterramento do tendido aéreo de telefonía. En total, afectará a unha área de 5.170 metros cadrados moi utilizada polos veciños da zona.
Con esta actuación preténdese dar resposta ás demandas veciñais e solucionar as graves deficiencias no pavimento e nas redes de saneamento que sofre esta zona. O primeiro está moi envellecido e presenta gretas, fochas e irregularidades, causando condución insegura, pero tamén bordos en mal estado e obstáculos para os peóns. Ademais, a zona carece de sumidoiros abondo para a recollida de augas pluviais mentres que a rede de saneamento presenta mal estado.
Con esta iniciativa, o Goberno local continúa apostando por mellorar a calidade de vida dos barrios, modernizando as súas infraestruturas e espazos e apostando por unha maior accesibilidade.
