Están incluídas dentro do Plan DTC 93 da Deputación. Substituiranse as lousas de pedra actuais por un novo pavimento de formigón
Ao longo das vindeiras semanas a céntrica rúa da Igrexa, na vila de Ordes, permanecerá cortada ao tráfico debido ás obras de mellora que se están a acometer. Unha intervención urbanística inclúe o cambio do firme actual construído con lousas de pedra por unha capa de formigón. Con esta medida preténdese resolver o problema da deterioración continua que presenta este punto duns 100 metros aproximadamente. Un problema en gran parte provocado pola circulación frecuente de auga dado o elevado grao de pendente que presenta toda a vía.
O departamento de Urbanismo pretende ter concluído o proceso de arranxo “antes de que dean comezo as festas de Nadal”, asegura o alcalde Manuel Regos. A presenza de establecementos comerciais no lugar aprema o seu arranxo ante as vindeiras festas “sen esquecer tamén que hai vivendas particulares, almacéns e baixos que se utilizan para diversas actividades”, manifesta Regos.
A dita obra está incluída no Plan DTC 93 da Deputación da Coruña, no que se investirán un total de 250.000 euros no municipio para o arranxo e mellora doutros puntos do casco urbano, incluíndo sistemas luminosos.
