No marco da programación do Xuño da Cultura e as Artes de Riveira, o prestixioso experto Rafael Lema Mouzo, profundo coñecedor do noso patrimonio marítimo, presentou no serán de onte no Centro Cultural Lustres Rivas o seu novo libro “Costa da Morte. Crónica Marítima”: unha interesante e voluminosa investigación na que ademais de rachar con algúns dos tópicos negativos que envolven a esta terra enfatizou a dimensión de Galicia como verdadeiro centro planetario do mundo do mar.
Non é esta a primeira vez en que Lema Mouzo recala na instalación municipal pois xa fai tres anos anos dera a coñecer o seu volume “Catálogo de Naufraxios da Costa da Morte”.
O relator –que estivo acompañado na mesa pola concelleira de Cultura Herminia Pouso e o arquiveiro municipal José Antonio Otero- disertou sobre aspectos vinculados co Barbanza tan interesantes como o papel que localidades como Palmeira ou Riveira xogaron á hora de proveer de navegantes a toda a flota española ou a máis que probable existencia de vestixios da industria de salazón de orixe romana en lugares do noso municipio como Corrubedo ou Sálvora.
O evento, de máis dunha hora de duración, finalizou cun interesante debate cos asistentes reunidos e unha firma de exemplares.
