As achegas teñen como obxectivo a modernización de producións a través de plans de mellora e a incorporación de mozos á actividade agraria e gandeira
A Consellería do Medio Rural apoiou en 2016 a un total de 300 explotacións agrarias da provincia da Coruña con achegas para modernizar as súas producións a través de plans de mellora e para incorporacións dos mozos á actividade agraria e gandeira, facilitando axudas de preto de 15,6 millóns de euros.
Estas cifras foron resaltadas polo delegado territorial da Xunta na Coruña, Ovidio Rodeiro, na visita á explotación agraria Horta Bértoa, no concello da Laracha, que recibirá con cargo á orde de 2016 unha axuda para aumentar en 2.000 metros cadrados a súa superficie de invernadoiros e outra subvención para a incorporación dunha moza como cotitular da empresa.
Os beneficiarios destas dúas liñas de axudas son explotacións agrarias e gandeiras que, por unha banda, reciben subvencións de máis de 60.000 euros de media para financiar os investimentos materiais e inmateriais que supoñan unha mellora do rendemento global da explotación, como a compra de nova maquinaria, plantación e mellora de cultivos, a posta en marcha de novas instalacións ou terreos e a adquisición ou desenvolvemento de programas informáticos. Por outra banda, tamén se incorporaron ao agro 164 novos mozos e mozas, cunha axuda media de 40.000 euros.
Grazas a estas liñas de axuda o investimento global no agro da provincia da Coruña foi de preto de 25 millóns de euros, contando as achegas para os novos investimentos realizados polos titulares das explotacións.
O delegado territorial afirmou que o Goberno galego seguirá traballando e apostando polo rural, “fomentando a creación de emprego, mellorando o volume e a competitividade das explotacións e adecuando a prestación de servizos básicos que axuden á fixación da poboación no medio rural, con iniciativas como a posta en marcha do programa impostos cero, que eliminou os tributos por mercar ou permutar parcelas e fai que os mozos e familias numerosas non teñan que pagar nin un euro de impostos por mercar a súa vivenda habitual”.
