A concelleira de Mobilidade, Begoña Freire, acompañada por representantes da Universidade dá Coruña (UDC), Stop Accidentes e colectivos ciclistas, presentou o proxecto municipal que conectará a bicicleta coa Universidade da Coruña (UDC), en concreto, entre a praza de Luis Seoane e o Campus de Elviña. “É a primeira vez que se constrúe un carril bici urbano na Coruña efectivo para desprazamentos diarios e non só de ocio”, destacou Freire, quen engadiu: “E eliximos este itinerario seguindo a orde de prioridades do PMUS, por ser a Universidade o maior centro de atracción de desprazamentos da cidade e o que ten o maior número de usuarios potenciais; consensuando esta decisión coas asociacións ciclistas, coas que existe un diálogo diario en moitas accións e un convenio de colaboración que traballa en obxectivos concretos como o que hoxe presentamos”.
Neste sentido, a concelleira explicou que a actuación, que ten unha lonxitude de 1.510 metros, se realizará dende a UDC (parte lateral da pista de tenis) ata a avenida de Pablo Picasso, pasando pola avenida de Glasgow.
“A actuación presenta unha descontinuidade temporal como consecuencia das obras de conexión Elviña – O Birloque que se están a realizar na avenida de San Cristóbal e que, cando finalicen, darán continuidade a este segmento a través da pasarela que posibilitará o tránsito peonil e ciclista”, destacou Freire, quen explicou as actuacións concretas que se van levar a cabo e que comezarán este mes cun prazo de execución de mes e medio e un importe de adxudicación de 57.404,34 euros:
1. As obras parten da marxe esquerda das pistas de tenis, existentes no Campus Universitario de Elviña, aproveitando plataformas e senllas existentes que se acondicionarán mediante pavimentación e sinalización. O itinerario transcorre polo paso inferior existente na vía, alcanzando a rede viaria do ámbito do centro comercial Espazo Coruña. Nese tramo, o itinerario acondicionado terá un uso compartido co peón e será sinalizado. Xa no ámbito do centro comercial, e ata alcanzar a avenida de Glasgow, executarase unha nova plataforma ao nivel da beirarrúa, conseguindo a segregación entre o tráfico e o tránsito peón – ciclista. O itinerario estará sinalizado.
1. Na avenida de Glasgow, dende Espazo Coruña ata a Asociación de Veciños do Birloque, a vía será segregada maioritariamente, aínda que de xeito puntual haberá usos compartidos co peón. Neste tramo, o uso compartido será sinalizado con baldosas de cor e textura diferenciada das actuais; e as plataformas exclusivas de ciclistas serán de nova creación ou implantadas sobre a calzada existente, anulando un carril da calzada e executando a separación dos tráficos con elementos de caucho reciclado con forma elipsoidal, cor negra e bandas reflectantes.
2. Ademais, realizaranse obras complementarias para a mellora do tramo existente na avenida de Pablo Picasso. En concreto, substituiranse os separadores de ferro por uns de caucho reciclado, menos perigosos, dándolle uniformidade ao itinerario e mellorando a seguridade vial conforme ao detectado no PMUS.
“En definitiva, falamos dunha iniciativa inédita, que dá resposta a unha demanda de varias décadas e na que, por primeira vez nesta cidade, se dá prioridade á bicicleta e, ademais, sen xerar problemas de circulación e mesmo creando novas prazas de estacionamento. Este tramo forma parte dun itinerario que conecta co centro da zona urbana e que terá puntos de conexión con outros itinerarios do PMUS”, explicou a responsable de mobilidade, quen destacou o compromiso municipal por dar prioridade á mobilidade sostible.
“O noso Plan de Mobilidade dedicou un apartado moi importante ao fomento da mobilidade ciclista e, neste sentido, consideramos novos itinerarios, xa que a situación actual inclúe tan só infraestruturas orientadas ao ocio ao longo do litoral sen ningún tipo de carácter funcional. O noso obxectivo é mellorar a rede existente, eliminando as súas descontinuidades, crear unha verdadeira rede de itinerarios ciclistas no interior do viario, conectar os barrios e conectar a rede co ámbito metropolitano, posibilitando a conexión da cidade cos municipios do consorcio Das mariñas. Todo para que a bicicleta se converta nun medio de transporte máis habitual na cidade”.
Ademais, Begoña Freire destacou a análise que se realizou dende a Concellaría de Tráfico e Mobilidade sobre a situación da bicicleta e que bota como conclusión a necesidade dun cambio drástico de enfoque respecto a anteriores políticas. Neste sentido, sinalou de novo o PMUS como unha das principais ferramentas para potenciar a utilización das bicicletas como medio de desprazamento e non só como elemento de ocio.
“Para conseguir todos estes obxectivos estanse a traballar en moitas frontes, coordinando os esforzos municipais de todas as áreas e co compromiso de todos para romper con ideas preconcibidas e que para que en 10 anos se multipliquen por 12 o número de desprazamentos diarios que se realizan en bicicleta” explicou Freire, quen concluíu: “O traballo que estamos a facer é firme e constante. Realizamos un diagnóstico profundo cos propios interesados, analizando todas as debilidades e necesidades; deseñamos a rede de itinerarios cos propios ciclistas; consensuado os proxectos con todos os implicados; revisadas todas as obras ordinarias de forma que a colocación de mobiliario e distribución se adapte aos itinerarios formulados. Tamén subscribimos convenios de colaboración cos colectivos ciclistas; incluído a presenza da bicicleta na Semana Europea da Mobilidade e, en xeral, en todas as accións de mobilidade que realizamos. En definitiva, hoxe iníciase un camiño que conta coa bicicleta como principal axente e que non ten marcha atrás”.
