O Concello de Riveira informa da conclusión dunha nova actuación consistente na mellora dun camiño rural en Agro da Cuña, lugar situado en Vixán, na parroquia de Carreira.
A actuación foi realizada pola empresa Alberto Pérez Sampedro e o seu prezo ascendeu a 45.796,44 euros, IVE incluído. A obra conta cunha achega da Xunta adscrita a axudas a investimentos non produtivos vinculados á realización de obxectivos agroambientais e climáticos no ámbito dos parques naturais de Galicia.
Charcos e surcos
O camiño situado dentro do parque natural do Complexo Dunar de Corrubedo e Lagoas de Carregal e Vixán, serviu para solucionar as incidencias que presentaba en época de mal tempo en forma de charcos e surcos que dificultaban o acceso ás fincas e vivendas da contorna.
Por esta razón elaborouse un proxecto técnico que incluíu a adecuación da parte inicial e final do camiño pavimentándoo cun firme que permita o tránsito de forma cómoda e segura. A tal efecto aplicouse un pavimento continuo ecolóxico de 15 centímetros de espesor a base de cal hidráulica natural en consonancia co espazo protexido no que está ubicado. A superficie total mellorada foi de 1.395 metros cadrados.
