Tivo lugar no auditorio da casa da cultura a primeira cita musical do ano na vila de Ordes. O Festival de Ano Novo ofrecido polos nenos e nenas da Escola Municipal de Música congregou a centos de persoas no auditorio da Casa da Cultura. Veciños, veciñas, familiares e amigos puideron ver o talento dos máis de 100 participantes que subiron ao escenario, que deixaron patente que o futuro musical da vila está salvagardado. Cada unha e un deles forman parte dos distintos grupos da escola; Música en movemento, piano, guitarra, percusión, combo-rock, ademais da Banda Xuvenil e da Big Band Jazz. Entre os que desfrutaron desta mañá tan musical, que superou a hora de duración, non faltaron o alcalde de Ordes e a concelleira de Medio Ambiente, José Luis Martínez Sanjurjo e Ana Soneira.