O Concello de Ordes felicita a Eduardo Rodríguez Regos, xefe da Policía Local, polos seus 25 anos de servizo ao servizo da cidadanía. Unha celebración que no día de onte tivo como acto central a imposición de medallas a un total de 50 axentes que cumpriron as súas vodas de prata. A cita foi en A Estrada, onde tamén acudiu o alcalde de Ordes, Manuel Regos. “Eduardo é un orgullo non só para o noso municipio senón tamén para un corpo tan querido por nós como é o da Policía Local. Un aprezo que se lle brinda non só pola súa calidade como persoa, senón pola dedicación e entrega que demostra diariamente nas súas funcións e polo apoio e compañeirismo que presta a todos os veciños, veciñas e traballadores do Concello. Sei que non é unha esaxeración dicir que Ordes está en débeda con este defensor da lei que non deixa de velar polo benestar e a seguridade de todos nós”, manifesta Manuel Regos con orgullo e emoción.
Ademais do cabeza de goberno de Ordes ao dito acto tamén acudiron o edil de Santiago e o vicepresidente da Xunta de Galicia, Agustín Hernández e Alfonso Rueda respectivamente. Eles foron os encargados de recoñecer e premiar tamén a labor da Policía Local de Santiago pola súa actuación o ano pasado no accidente ferroviario de Angrois, así como o acto heroico do axente David Abollo ao salvar a un home que a piques estivo de morrer afogado ao precipitarse ao río Lérez.
