O servizo está a asumir unha enorme carga de traballo e un elevado custo económico que perturba as arcas municipais
O Servizo de Emerxencias e Protección Civil de Cambre, retirou 375 niños de avispas velutinas desde o mes de xullo, o que supón a retirada diaria de polo menos tres niños. Ademais, existen 70 solicitudes sen atender pola alta carga de traballo do servizo e a falta de medios e de persoal.
Segundo a concelleira de Seguridade Cidadá, María Vázquez, o servizo está a asumir unha enorme carga de traballo e un elevado custo económico que perturba as arcas municipais. “Estamos a asumir unha competencia que non é nosa, pero non podemos deixar de lado o risco que supoñen para os nosos veciños e para o medio ambiente en xeral. Pedirémoslle responsabilidades á Xunta. Considerádevos que é de xustiza que o alto custo que asumen os veciños de Cambre sexa devolto por quen corresponde”, apuntou. Cre que a Xunta debe de atallar o problema cun plan integral contra esta especie invasora porque pola contra será imposible combatelas.
Lembra que Cambre contratou a un profesional co obxectivo de dedicarse á retirada destes niños ante a cantidade de chamadas diarias de veciños alertando da proximidade ás súas casas desta especie invasora.
Segundo o coordinador do Servizo de Emerxencias, Manuel Vázquez Souto, a empresa concesionaria da retirada destes niños contratada pola Xunta a penas aparece por Cambre e a gran maioría das chamadas son atendidas polo seu servizo que asegura estar “desbordado”.
Nestes momentos o servizo atende de media unha decena de chamadas diarias e o servizo non pode atender a todas as demandas posto que non conta con máis persoal e con máis medios para retirar os niños, abrigo os que se atopan nas copas das árbores, a alturas de máis de 25 metros. “É inviable retirar niños a estas alturas porque non contamos cos medios suficientes para iso, e a pesar diso as chamadas non cesan”.
