A titular deste departamento, Ángeles Vázquez, asumiu este compromiso nunha reunión co alcalde do municipio de Touro, Ignacio Codesido
A Consellería do Medio Rural estudará ampliar o ámbito xeográfico de produción da Indicación Xeográfica Protexida (IXP) Castaña de Galicia para incorporar o concello coruñés de Touro, que actualmente se atopa no límite do territorio desta IXP, pero fóra del. Así o acordaron a propia conselleira, Ángeles Vázquez, e o alcalde de Touro, Ignacio Codesido, nunha recente reunión de traballo. O devandito ámbito xeográfico comprende actualmente a área delimitada ao oeste pola Dorsal Galega e pola Serra do Xistral cara ao norte. Abarca varios concellos das provincias da Coruña, Lugo e Pontevedra, ademáis da totalidade dos de Ourense.
O rexedor municipal de Touro trasladou á titular de Medio Rural a solicitude de integración do seu concello baixo o paraugas desta indicación, tendo en conta a relevancia da produción de castaña no seu territorio, unha petición que Ángeles Vázquez comprometeuse a valorar. Este amparo daríalle ao froito cultivado en Touro un valor engadido, potenciando a súa calidade e facilitando a súa comercialización nos diferentes mercados.
Ordenación agraria
Por outra banda, Medio Rural e o Concello de Touro colaborarán tamén para impulsar a ordenación do territorio agrario deste municipio. Ambas institucións traballarán para axilizar as concentracións parcelarias pendentes e para poñer en marcha os procesos no resto da superficie municipal, co obxectivo de reestruturar por completo a propiedade das súas terras. En Touro están abertas actualmente catro zonas de concentración. Trátase das de Loxo-Enquerentes-Fonterrosas-Ribeira; Touro-Quión; Montes de Foxás e Bendaña e Montes de Vilar. As dúas primeiras atópanse en fase de rexistro e as outras dúas en fase de acordo. Nestes casos axilizaranse os trámites para completar os procesos canto antes. Ademáis, a conselleira de Medio Rural asumiu co rexedor municipal o compromiso de impulsar a parcelaria no resto do territorio municipal.
Ao longo do 2016 Medio Rural investiu nas áreas de Vilar e Foxás-Bendaña preto de 40.000 euros, destinados fundamentalmente ao trazado de camiños. Estes fondos súmanse aos case 110.000 euros achegados pola Xunta dentro do Plan de mellora de infraestruturas rurais, que serviron para mellorar viarias nas zonas de Loxo-Enquerentes-Fonterrosas-Ribeira e de Touro-Quión.
