Este ano multiplicaranse as ofertas de programas de conciliación xa que ao Christmas Camp do Concello súmanse os campus da ED Xuventude de Oroso e do Club Patín Oroso
O Concello de Oroso vén de face público o seu Programa de Nadal, que chega cargado de actividades para todos os gustos e idades, e case todas de balde. Un programa que combina propostas tradicionais con varias novidades, moitas delas en colaboración co sector comercial e hostaleiro orosán. É o caso do I Concurso de Escaparates de Nadal, que terá lugar entre o 14 de decembro e o 6 de xaneiro, ou da campaña de recollida de alimentos, produtos de hixiene persoal e do fogar, que este ano se suma á iniciativa En Reis, ningunha nena nin neno sen regalos na que participan 90 locais para recoller cartos cos que mercar agasallos para as familias máis desfavorecidas do municipio.
Outra novidade é o Mercado de Artesanía, que terá lugar nas rúas Xuncal e Lengüelle o 23 de decembro, en horario de 10:00 a 14:00 horas e de 16:00 a 21:00 horas. Unha iniciativa aberta á participación da veciñanza, que só ten que anotarse no Centro Cultural de Sigüeiro para obter o seu posto. O deporte completa as novidades deste ano, coa primeira edición do Torneo de Pádel Xuventude, que terá lugar nas mañás do 29 e 30 de decembro.
Conciliación
Así mesmo, este ano as familias de Oroso disporán de ata tres ofertas distintas de conciliación. Por unha banda, o Concello de Oroso e Escuela Contalento convocan o Christmas Camp 2016, dirixido a nenos e nenas de entre 3 e 12 anos e que terá lugar no CEIP do Camiño Inglés ao longo de 11e días (22, 23, 26, 27, 28, 29 e 30 de decembro e 2, 3, 4 e 5 de xaneiro). As cotas de inscrición oscilan entre os 60 euros (para o horario de 9:00 a 14:00 horas) e os 80 euros (de 7:30 a 15:30 horas). Inscricións no Centro Cultural de Sigüeiro (981 69 09 03) ou na Escuela Contalento, no paseo do Carboeiro 9 (881 981 905 ou 604 002 616).
Por outra, a ED Xuventude de Oroso, en colaboración co Concello de Oroso, pon en marcha o seu primeiro Campus de Nadal, do 26 de decembro ao 5 de xaneiro, en horario de 10:00 a 14:00 horas. Está dirixido a nenos e nenas de 4 a 16 anos e os prezos oscilan entre os 50 euros (dúas semanas) e 30 euros (do 26 ao 30 de decembro) ou 25 euros (do 2 ao 5 de xaneiro). Inscricións no campo de fútbol ou no centro deportivo Juanito Amigo de Sigüeiro.
E a terceira oferta é o Nadal sobre Rodas en Familia, que organiza o Club Patín Oroso en colaboración co Concello de Oroso. Neste caso, a iniciativa terá lugar do 26 ao 30 de decembro, de 8:30 a 14:30 horas. Haberá xogos, obradoiros, patinaxe, hockey, merenda… por 50 euros de matrícula. Inscricións no centro deportivo Juanito Amigo de Sigüeiro ou no 659 896 895.
Actividades
A aceptación ou non da veciñanza será quen decida se estas actividades volven repetir o ano que vén, como acontece coa excursión Birlos e patinaxe sobre xeo (luns 26), o Concerto de Nadal da Aula de Música (venres 20) ou o obradoiro Imos Cantar os Reis (3 de xaneiro), que inclúe a construción dos instrumentos e a saída a cantar polos establecementos da contorna para pedir o aguinaldo. Tamén haberá tempo para a maxia, co Mago Linaje e La magia de la Navidad (venres 28), e para o teatro, con Gretel e bela, de Teatro da Semente (xoves 22).
Canda estas novidades repiten os clásicos destas datas: o concurso de postais de Nadal con Mensaxe, o Belén vivente da gardería A Ulloa (venres 16, ás 18:00 horas), o Festival do CRA e as visitas dos Paxes Reais (mércores 21), o baile de Nadal para maiores (sábado 27, ás 19:30 horas), o concerto de Panxoliñas (venres 23, ás 20:30 horas), a gran Cabalgata de Reis (5 de xaneiro, ás 18:00 horas) ou os obradoiros de Nadal (xoves 29, ás 17:00 horas) e de Carbón de Reis (4 de xaneiro, ás 17:00 horas). Todas as actividades terán lugar no centro cultural de Sigüeiro e son de participación gratuíta e libre, salvo nos obradoiros nos que é preciso anotarse previamente no centro cultural.
E todo sen esquencer o programa de animación á lectura da Biblioteca Municipal de Sigüeiro: con contacontos (sábado 17 de decembro, ás 11:00 horas), club de lectura (venres 23, ás 18:00 horas) e Rebotica dos Contos (venres 30, ás 18.00 horas). Inscricións e máis información no centro cultural (981 690 903) e www.concellooroso.com.
