O acto tamén contou coa presenza de Pilar Farjas, da secretaria autonómica do Sindicato de Enfermería SATSE, a do xornalista Antonio López Mariño e coa directora da revista Enfermería en Desarrollo. O alcalde de Ordes fixo fincapé na importancia de difundir a súa figura e labor no eido académico
O Concello de Ordes celebrou un acto centrado na figura e na xesta histórica levada a cabo pola recentemente nomeada veciña ilustre Isabel Zendal Gómez. Entre outros contouse coas participacións de Miguel Ángel Santalices Vieira, Presidente do Parlamento de Galicia; José Luis Martínez Sanjurjo, Alcalde de Ordes; Carmen García Rivas, secretaria autonómica do Sindicato de Enfermería, SATSE (Galicia); Pilar Farjas, presidenta da Asociación Isabel Zendal, (exconselleira de Sanidade); Yolanda Núñez Gelado, directora da revista Enfermería en Desarrollo e Antonio López Mariño, xornalista.
Ademais dos relatores tamén se contou coa asistencia do subdirector de Saúde Pública, Xurxo Hervada; coa do decano da facultade de Medicina de Santiago; así como os principais representantes da corporación local e membros da Mancomunidade de Ordes, encabezados polo seu presidente, Roberto Iglesias.
O momento central do encontro foi a estrea do documental Isabel Zendal, a enfermeira que cambiou o rumbo do mundo, realizado por Enfermería TV e o Sindicato Médico SATSE. Un traballo que conta cos testemuños de autores, investigadores e profesionais do ámbito sanitario os cales poñen de relevo o gran legado e as consecuencias beneficiosas que para toda a saúde da humanidade aportou esta muller, natural da parroquia de Parada (Ordes).
Neste día tamén se fixo especial mención por parte do alcalde de Ordes ao Premio Especial Enfermería en Desarrollo que a coñecida publicación temática do eido da enfermería vén de concederlle recentemente a Isabel Zendal. Uns galardóns considerados como unha das maiores referencias a nivel nacional no ámbito da enfermería. No seu turno de palabra o rexedor agradeceu a presenza de todas e todos os convidados, que encheron a casa da cultura. Tamén fixo alusión á importancia de impartir unha unidade didáctica sobre Isabel Zendal nos centros académicos. Algo que se compaxina e coincide coa intención da asociación Isabel Zendal de realizar unha publicación dirixida ao colectivo estudiantil co fin de difundir o seu legado.
Pola súa banda o presidente do Parlamento de Galicia destacou, dende unha perspectiva médida, da importancia de Isabel Zendal para a erradicación da varíola por todo o mundo.
Isabel Zendal está cosiderada pola OMS como a primeira enfermeira da historia en participar nunha campaña mundial de vacinación internacional.
