As inscricións xa se poden realizar tanto na oficina de emprego de Ordes como na páxina web do Servizo Público de Emprego de Galicia. Impartiranse a partir do vindeiro mes de xullo
A Consellería de Economía, Emprego e Industria vén de concederlle ao Concello de Ordes dous cursos de atención sociosanitaria. Ambos están integrados na súa programación de accións formativas para persoas desempregadas e darán comezo a partir do mes de xullo.
O curso de atención sociosanitaria para persoas dependentes en institucións sociais terá unha duración de 478 horas. Unha formación que permitirá a quen a acade traballar ao coidado de persoas cunha discapacidade física, psíquica ou sensorial e persoas dependentes, ou como xerocultores en centros de día ou privados.
O segundo curso, de 628 horas, é de atención sociosanitaria para persoas dependentes no fogar. Permitirá traballar como auxiliar de axuda a domicilio, asistente de atención domiciliaria ou ao coidado de persoas maiores, convalecentes ou cunha discapacidade.
Ambos os cursos inclúen dereito a certificado de profesionalidade de nivel 2 e prácticas en empresas, sendo imprescindible para acceder a eles estar en posesión da ESO, competencias clave nivel 2 ou equivalentes.
As persoas interesadas deberán inscribirse na Oficina de Emprego de Ordes ou ben na páxina web do portal do Servizo Público de Emprego de Galicia www.emprego.xunta.es.
