Conta coa colaboración da firma boirense Juan Ares Marine Design
Por iniciativa da Xunta de Galicia e da Fundación Centro Galego de Artesanía e do Deseño (que xestiona a marca comercial Artesanía de Galicia), o Mercado Municipal de Riveira está a albergar no seu primeiro andar un workshop dirixido a redeiras sobre produción de mobiliario da firma boirense Juan Ares Marine Design.
A acción formativa incardínase no programa Enredados, promovido polas consellerías de Industria e do Mar coa intención de impulsar a diversificación e a posta en valor do traballo das redeiras co deseño e produción de novos produtos artesáns.
Comezou na tarde de onte e vaise prolongar ao longo de 60 horas distribuídas entre os días días 26, 27 e 28 de maio e 2, 3, 4, 8, 9 e 10 de xuño (hoxe estarán de 10 a 14 e de 16 a 20 horas).
Os docentes son o deseñador de produto Juan Ares (http://www.juanares.es/) e a artesá de cestería contemporánea Idoia Cuesta. Asisten oito redeiras, todas con carta de artesá.
A acción consiste na elaboración de prototipos e deseños da propiedade rexistrada de Juan Ares Marine Design, que terá capacidade da súa comercialización, o que se traduce na posibilidade de que a elaboración dos produtos poda ser encargada ás propias redeiras participantes obtendo así uns ingresos complementarios a través desta vía innovadora de traballo.
Clausura de Quere o teu mercado
Por outra banda, cómpre informar de que mañá sábado ás 12.30 horas terá lugar a clausura da campaña internacional Quere o teu mercado coa actuación musical do grupo Aires do Barbanza da Asociación de Amas de Casa de Riveira.
