JOSÉ LUIS MARTÍNEZ SANJURJO, ALCALDE DO CONCELLO DE ORDES
FAI SABER
Con motivo da celebración das Cacharelas da Noite de San Xoán as persoas, asociacións ou entidades organizadoras deberán comunicar a realización da cacharela no Rexistro Xeral do Concello antes das 14:00 horas do 21 de xuño e a súa realización estará suxeita ao cumprimento das seguintes normas:
UBICACIÓN
Dominio público:
Prazas, parques e xardíns municipais (así como calquera outro ben de dominio público de carácter especial): Deberá contar coa previa autorización.
Vías públicas pavimentadas e beirarrúas: Autorízase a súa realización pero deberá protexerse o pavimento cunha chapa metálica sobre a que se colocará unha capa de area de 10,00 cm. O Concello facilitará area a todas aquelas persoas que o soliciten.
Vías públicas non pavimentadas: Autorízase a súa realización.
Os organizadores da cacharela serán os responsables dos danos que se puideran producir no dominio público e deberán proceder ao abono dos gastos de reconstrucción e reparación ocasionados pola realización da cacharela.
Propiedade privada:
Deberá contar coa previa autorización do propietario dos terreos, non asumindo este Concello ningunha responsabilidade en caso de que a queima se realice sen terse obtido.
NORMAS
As cacharelas deberán observar as seguintes normas de seguridade para evitar situacións de perigo, así como a producción de danos aos participantes e bens sitos nas súas proximidades:
O volume de combustible da cacharela non sobrepasará os 8,00 m de perímetro nin os 3,00 m de altura.
A separación da cacharela dos edificios e árbores será como mínimo de 8,00 m.
A cacharela non poderá situarse baixo tendidos eléctricos ou telefónicos.
Está prohibida a queima de pneumáticos, plásticos, escumas de poliuretano, aceites, ou calquera outro producto que conteña líquidos inflamables, gases a presión ou que ao arder poida desprender fume tóxico.
Ao remate da celebración comprobarase que as cinsas da cacharela quedan totalmente apagadas.
Deberá procederse á retirada dos restos da cacharela do lugar de celebración nun prazo máximo de 24 horas.
A Policía Local vixiará o cumprimento das normas anteriores formulando en caso de incumprimento a correspondente denuncia que dará lugar á iniciación de procedemento sancionador, así como a esixencia de indemnización dos danos e prexuízos que se causen no dominio público local.
