Haberá rutas, carreiras de andadura, probas de andadura de trotadores, concurso de barrís e de touro mecánico, xantares populares, música e moita festa e diversión. En total repartiranse preto de 500 € en premios
O venres e o sábado 3 e 4 de xuño a parroquia de Ardemil acollerá a súa VI Xuntanza Cabalar, na que a día de hoxe xa teñen confirmada a súa participación máis de 150 xinetes.
Tal e como é habitual o primeiro día terá lugar unha gran festa na que se repartirá entre todas e todos os asistentes touciño entrefebrado a partir das 20 horas. Por suposto a música en vivo non faltará para animar a velada que, de seguro, se prolongará ata ben entrada a noite.
Xa de cara ao segundo día o programa iniciarase ás 10 horas con saídas en ruta. Ás 11.30 e 12 horas terán lugar as carreiras de andadura cruzados serrada e chapeada federada respectivamente. Ás 13 horas oficiarase unha misa con procesión na honra a Santo Antonio e na que tamén se bendicirán os animais. Ademais contarase coa presenza de gaiteiros que animarán o momento cos seus sons tradicionais xusto antes do xantar, previsto para as 14 horas. Este ano o menú estará composto de lacón asado, patacas estufadas, sobremesas, viño, auga, refrescos, café e chupitos.
O programa da tarde arrancará ás 16 horas co concurso de barrís con 100 € en premios. Ás 16.30, 17.30 e 18 horas será o momento para as probas de andadura de trotadores libre, trotadores federada e trote de trotadores libre respectivamente. Neste caso os premios roldarán os 400 € en total. Por último ás 18.30 horas arrancará o concurso de touro mecánico. No caso dos máis pequenos, ademais, poderán desfrutar de paseos e rutas a cabalo completamente gratis.
Aquelas persoas que estean pensando en participar, xa sexa no xantar popular ou ben nalgunha das probas, aínda están a tempo de facelo chamando ao teléfono 630199594.
A Asociación Cultural Cabaleiros de Ardemil, organizadora da xuntanza, conta novamente coa colaboración do Concello de Ordes para a súa posta en marcha. Tamén participan a Deputación da Coruña, o restaurante Avelino, servizos veterinarios e equinos Serveteq e a Federación Hípica Galega.
