 O investimento supera os 70.000 euros ao abeiro do POS+2025

O goberno municipal de Ribeira continúa traballando na mellora de servizos básicos e nesta semana comezaron as obras para a ampliación da rede de saneamento no lugar de Muíños, na parroquia de Oleiros. A concelleira de Obras, Herminia Pouso, e o seu homólogo de Xestión e Relacións Veciñais no Medio Rural, Eladio Muñiz, desprazáronse ata o lugar para comprobar o inicio dunha intervención que completará a dita rede no núcleo poboacional ao abeiro do POS+2025.

En consecuencia, demolerase o pavimento existente e colocarase a tubaxe ao longo de 421 metros, ademais de 12 pozos de rexistro, para rematar coa reposición do firme con mestura bituminosa en quente de 6 cm de espesor. A empresa Nemesio Ordóñez, S.A. é a encargada de efectuar estes traballos por un importe total de 70.743 euros, IVE incluído, ao longo de tres meses.