Máis de 600 persoas participaron este domingo na primeira edición da Carreira Concello de Oleiros, unha proba deportiva de 8,5 quilómetros que percorreu as parroquias de Iñás e Nós.

A carreira, que comezou e finalizou na Casa do Pobo de Iñás, tivo a Facundo Medard como gañador na categoría masculina e a Leire García na feminina; aínda que realmente a vitoria foi para todos e todas as participantes, que completaron a proba antes do tempo de corte establecido (1 hora e media).

Ademais, a carreira congregou a todo tipo de corredores, con participantes que foron dende a idade sub 14 ata máster 65, amosando o carácter integrador do evento. Tamén houbo unha notable participación da veciñanza, que ao longo de todo o percorrido animou aos corredores.

Con esta primeira edición, o Concello de Oleiros incorpora unha nova proba ao calendario deportivo municipal, que permite combinar a práctica deportiva co percorrido por un dos grandes espazos naturais de Oleiros, o paseo fluvial de Iñás e Nós.

RESULTADOS: https://carreiraoleiros.ccnorte.com/es/web/resultado/competicion-17818