O candidato socialista aposta por reforzar a colaboración entre o Concello, a Universidade, os centros de investigación e o tecido asociativo para aproveitar o talento e a capacidade investigadora de Santiago en beneficio das persoas

O Plan Especial do Terceiro Sector impulsará unha rede de cooperación e apoio ás entidades sociais para xerar sinerxías, compartir coñecemento e mellorar a resposta ás necesidades da cidadanía

”Quereremos un Concello que non viva de costas á innovación, que saiba colaborar, sumar capacidades e poñer os recursos ao servizo dos santiagueses”

O candidato socialista á Alcaldía de Santiago, Pedro Blanco, aposta por unha Compostela onde a ciencia se traduza en mellor calidade de vida para a veciñanza. Nunha visita á Asociación Española Contra o Cancro (AECC) de Santiago, apelou a reforzar a colaboración entre o Concello, as entidades sociais, a Universidade e os centros de investigación para impulsar un ecosistema de innovación que aproveite o talento, o coñecemento e a capacidade científica da capital de Galicia en beneficio das persoas.
“Santiago ten un enorme potencial científico e universitario que debemos aproveitar moito máis. O coñecemento ten que traspasar as aulas e chegar á xente, contribuíndo a mellorar a súa saúde e ofrecendo respostas aos problemas reais da sociedade”, sinalou Pedro Blanco.
Neste obxectivo, o candidato socialista situou o Plan Especial do Terceiro Sector como unha ferramenta para fortalecer o tecido asociativo de Compostela e consolidar a súa colaboración co Concello de Santiago. A proposta contempla impulsar unha rede de apoio ás entidades sociais que favoreza a coordinación, o intercambio de experiencias e a creación de sinerxías entre organizacións que traballan directamente coas persoas. O plan busca avanzar cara un modelo no que as entidades sociais conten con máis apoio municipal, maior protagonismo e unha interlocución directa coa administración local, “para que o terceiro sector sexa o primeiro sector de Santiago”.
Durante a reunión, o candidato, xunto aos concelleiros socialistas Marta Abal e Gumersindo Guinarte, avaliou coa xunta directiva e cos traballadores da AECC as principais necesidades das persoas que sofren cancro e das súas familias en Compostela, así como os recursos e servizos que a entidade pon á súa disposición. Pedro Blanco puxo en valor o papel fundamental que desempeña a entidade na cidade, cunha atención integral que abrangue ámbitos como o apoio psicolóxico, o traballo social, os obradoiros terapéuticos, os programas de voluntariado ou o exercicio físico adaptado, entre outros.
“Queremos un Concello que non viva de costas á innovación, que saiba colaborar, sumar capacidades e poñer os recursos ao servizo dos santiagueses”, incidiu. Nesta liña, destacou a importancia de conectar ámbitos como o científico e o universitario coas necesidades das entidades sociais para dar unha mellor resposta ás demandas da cidade.
Ao mesmo tempo, reclamou á Xunta de Galicia que garanta os recursos e as políticas que lle corresponden en materia de sanidade pública, investigación e atención ás persoas con cancro. “A loita contra o cancro precisa ciencia, recursos públicos e acompañamento. Cada administración debe asumir as súas competencias e contribuír a que os avances e os servizos chegan a todos por igual”, subliñou.
Pedro Blanco aproveitou a visita para animar á cidadanía a participar e involucrarse na programación de actividades que desenvolve a AECC en Santiago durante todo o ano, como a Noite solidaria contra o cancro que terá lugar o vindeiro venres 23 de outubro.
Esta visita forma parte das #ConversasDeBarrio co que o candidato socialista está coñecendo de primeira man o traballo das entidades socias de Compostela, escoitando as demandas dos colectivos que representan para, unha vez estudadas as propostas, incorporalas ao proxecto de cidade para Santiago.