• A proposta contempla estudar o impacto das reformas, habilitar soares mediante acordos con propietarios e revisar a viabilidade dos aparcamentos anunciados hai anos e que seguen pendentes

• García reclama revisar o proxecto de Andrés Pan Vieiro cos veciños e compatibilizar a accesibilidade, a seguridade peonil e o estacionamento

A portavoz do PP de Culleredo, Izaskun García, comprométese a impulsar desde o goberno municipal un plan de aparcamento que identifique as necesidades de cada barrio e estableza actuacións, orzamento e calendario. A proposta inclúe avaliar a perda de estacionamentos e presentar alternativas viables e próximas antes de executar obras que reduzan as prazas dispoñibles. “Atopar onde aparcar é unha dificultade cotiá para moitos residentes e tamén afecta o comercio. A mellora das nosas rúas debe atender conxuntamente a accesibilidade, a seguridade peonil e as necesidades de estacionamento”, sinala García.
Tras visitar a rúa Andrés Pan Vieiro, no Burgo, e reunirse con veciños que están a recoller firmas, a portavoz popular reclama revisar o proxecto, que, segundo denuncia o PP, contempla eliminar ao redor de 30 prazas. Solicita tamén que o Concello explique o balance de estacionamentos e as alternativas previstas, incluída a localización, capacidade e dispoñibilidade da parcela que o alcalde anunciou como posible aparcamento.
O plan proposto polo PP contempla ademais estudar acordos con propietarios de soares para habilitar estacionamentos, comprobar a viabilidade dos aparcamentos anunciados desde hai anos no Burgo, Fonteculler e Vilaboa e priorizar a reparación de rúas e espazos públicos deteriorados. “Cada actuación debe partir das necesidades do barrio e de escoitar a quen vive e traballan nel. Os veciños deben coñecer que se propón, canto custa e cando poderá utilizarse”, afirma García.