• A iniciativa expón unha rede de corredores verdes que una o rural e os barrios, recupere camiños e achegue o patrimonio aos veciños

• O eurodeputado comprométese a explorar vías de financiamento europeo para desenvolver as actuacións por fases

 

A portavoz do Partido Popular de Culleredo, Izaskun García, presentou hoxe ao eurodeputado do PPdeGalicia Adrián Vázquez a súa proposta “Culleredo Verde”, unha rede de corredores que permitiría conectar o monte Xalo e A Zapateira cos barrios e a ría do Burgo.

A visita comezou cun encontro na sede local do PP, onde Izaskun García entregou ao eurodeputado un informe detallado con proxectos e melloras concretas para Culleredo que poderían acollerse a distintas liñas de financiamento europeo. O documento forma parte do traballo que o PP está a realizar para dispoñer, de cara ao próximo mandato, dunha folla de roteiro preparado e poder impulsar estas actuacións desde o goberno municipal.

A continuación, realizaron un percorrido polo paseo fluvial e a contorna do Rego de Trabe, ao seu paso por Vilaboa. Alí, Izaskun García explicou que a iniciativa pretende aproveitar o potencial natural, paisaxístico e patrimonial do concello para mellorar a mobilidade peonil, recuperar espazos degradados e crear novas zonas de paseo e lecer. “Culleredo Verde non consiste simplemente en construír sendas. Trátase de conectar o municipio, recuperar espazos hoxe desaproveitados e conseguir que o rural, as zonas urbanas e a ría formen parte dunha mesma visión de Culleredo”, sinalou.

A proposta do PP inclúe tamén a recuperación de camiños tradicionais e das contornas de distintas canles, a posta en valor dos Muíños de Acea de Ama e a Torre de Celas, a rexeneración de Fonte dá Balsa e o estudo de alternativas para reducir o efecto barreira das vías do tren na zona da Cros. O percorrido finalizou na ría do Burgo, onde Izaskun García e Adrián Vázquez tamén abordaron a necesidade de dar continuidade á súa recuperación ambiental tras a dragaxe cofinanciada con fondos europeos.

O eurodeputado comprometeuse a explorar posibles vías de financiamento comunitario para poder desenvolver por fases as actuacións contempladas en “Culleredo Verde”. “Europa ofrece oportunidades, pero fan falta proxectos definidos e responsables municipais capaces de convertelas en melloras reais. Izaskun ten unha visión clara do que necesita Culleredo e a capacidade para impulsala”, afirmou.
Pola súa banda, García destacou que “Culleredo non pode limitarse a esperar a que aparezan as oportunidades. Ten que anticiparse, preparar proxectos e buscar financiamento para converter cada recurso conseguido en melloras concretas para os veciños”.