O Concello de Outes informa á veciñanza e aos usuarios da rede viaria do inicio dos traballos de mellora da capa de rodaxe na estrada provincial DP-6202, que conecta a Outes coa estrada AC-400 a través de Valadares, en dirección ao Castelo.
A actuación consistirá na extensión dunha nova mestura bituminosa en quente co obxectivo de renovar o firme, corrixir os deterioros existentes e incrementar de xeito notable a seguridade vial en todo o trazado. As obras centraranse especificamente no tramo comprendido entre os puntos quilométricos 0+358 e 4+498.

Debido á presenza constante de operarios e maquinaria pesada sobre a calzada, o tráfico rodado verase condicionado mentres duren os traballos.
Por este motivo, desde o Concello pídese a todos os automobilistas que circulen con máxima precaución, que respecten escrupulosamente a sinalización provisional de obra e que reduzan a velocidade para garantir a seguridade laboral e dos propios usuarios.

O goberno municipal agradece de antemán a colaboración cidadá e prega desculpas polas molestias temporais que esta necesaria intervención poida ocasionar, a cal suporá unha importante modernización das infraestruturas do municipio.