Ao redor de medio cento de fogares de Neda dispoñen xa dos lotes de packs de bolsas de reciclaxe, repartidos polo Concello dende a semana pasada para facilitar a separación en orixe dos residuos domiciliarios. Trátase dunha acción simbólica de concienciación ambiental, destinada a que a incentivar que a veciñanza colabore na reciclaxe.

A biblioteca municipal distribuirá ata fin de existencias os sets de bolsas reutilizables, destinadas a depositar nas vivendas os envases lixeiros de plástico, metal e bricks (bolsa amarela); papel e cartón (azul); e os envases de vidro (verde), así como facilitar o seu traslado aos correspondentes contedores. Quedan contadas unidades.

Os últimos packs dispoñibles entregaranse xunto co folleto de boas prácticas destinado a axudar á veciñanza na correcta clasificación, contribuíndo a reducir o volume de “impropios”, é dicir, residuos que van parar ao colector equivocado.

A iniciativa forma parte da campaña “Reducir, reutilizar e reciclar está nas túas mans” que o Concello de Neda desenvolveu no último trimestre e que concluirá co envío aos fogares do municipio do folleto divulgativo que acaba de editarse.