Guinarte insta ao Goberno de Sanmartín a acelerar, xunto coa Xunta de Rueda, a tramitación das 29 novas licenzas de taxi tras máis de dous anos de demora nun procedemento imprescindible para a mobilidade da cidade.

O voceiro socialista lembra que os novos vehículos non estarán operativos ata a primavera de 2027 e alerta da necesidade de anticiparse ao incremento da demanda que traerá o próximo Xacobeo.

O voceiro do Grupo Municipal Socialista, Gumersindo Guinarte, reclamou ao Concello de Santiago e á Xunta de Galicia que aceleren a tramitación das 29 novas licenzas de taxi, despois de que a Xunta de Goberno Local aprobase o concurso para a súa concesión, un paso que chega máis de dous anos despois da solicitude de autorización remitida polo Concello á administración autonómica.
Guinarte valorou a aprobación deste avance, pero advertiu de que agora é imprescindible garantir “a máxima axilidade no que resta de tramitación”, xa que, malia tratarse “dun procedemento complexo”, considera que “as demoras acumuladas ata o momento resultan inxustificables” e insistiu en que “non poden repetirse nesta fase final ata a concesión definitiva das licenzas”.
O voceiro socialista lembrou que, segundo as previsións actuais, “os novos taxis non estarán operativos ata a primavera de 2027”, un calendario que, ao seu xuízo, “obriga a acelerar ao máximo os trámites pendentes” e “a evitar novas demoras nun procedemento que xa se prolongou durante demasiado tempo”.
Guinarte incidiu en que reforzar a frota de taxis é unha necesidade para Santiago, ao tratarse dun servizo que debe responder tanto ás necesidades da veciñanza como das persoas que visitan a cidade. Neste sentido, advertiu de que “Santiago necesita reforzar canto antes este servizo esencial”, especialmente “ás portas dun novo Ano Xacobeo”, que “volverá incrementar de forma significativa a demanda de mobilidade na cidade”.
Por todo iso, o Grupo Municipal Socialista insta ao Concello e á Xunta a colaborar para culminar este procedemento “coa máxima axilidade” e evitar que “as demoras acumuladas ata o momento” volvan condicionar a posta en marcha das novas licenzas. Porque, como subliña Gumersindo Guinarte, “Santiago necesita reforzar canto antes este servizo esencial”, especialmente “ás portas dun novo Ano Xacobeo”.