Alternativa dos Veciños critica o bloqueo político no Congreso e advirte de que infraestruturas imprescindibles, como a ampliación da ponte da Pasaxe, seguirán sen executarse mentres os partidos prioricen os seus intereses partidistas.

A posibilidade de que España encadee un cuarto ano consecutivo sen Orzamentos Xerais do Estado continúa a frear o avance en investimentos e infraestruturas fundamentais, tanto na comarca da Coruña como no conxunto do Estado. Alternativa dos Veciños alerta de que a ausencia dunhas novas contas públicas atrasará actuacións fundamentais para mellorar a mobilidade, un dos principais problemas que sofre diariamente a comarca da Coruña.

O alcalde de Oleiros, Ángel García Seoane, lembrou que esta falta de orzamentos impedirá avanzar en infraestruturas estratéxicas: “Sen orzamentos non haberá fondos para a construción de vivenda pública, nin para sanidade e educación, nin para investigación e ciencia… nin tampouco investimentos en novas obras públicas. Aquí, na comarca da Coruña, non imos ter ampliación da ponte da Pasaxe, fundamental para mellorar o tráfico da comarca. Nin tampouco o Vial 18, nin a glorieta e o túnel en Santa Cristina, nin a finalización da ampliación de Alfonso Molina”.

Para García Seoane, esta situación é consecuencia da incapacidade das forzas políticas con representación no Congreso para alcanzar acordos en asuntos que afectan directamente á cidadanía. “Sería bo lembrarlles a todos os deputados que temos no Congreso para que os eliximos”, afirmou, criticando que se utilice a negociación dos orzamentos como ferramenta de presión mentres outras manteñen unha oposición permanente que impide sacar adiante iniciativas de interese xeral.

O alcalde cuestionou tamén o papel dos 8 representantes da provincia da Coruña no Congreso dos Deputados: “4 do PP, 2 do PSOE, 1 do BNG e 1 de Sumar. Pero a que se dedican? Que é o que fan? Cales son as súas demandas? De que forma nos representan?”, preguntou.

Como exemplo da falta de prioridade que sofre a comarca, o alcalde lembrou que a ampliación da ponte de Rande rematou no ano 2017, mentres que a ampliación da ponte da Pasaxe continúa sen contratar, a pesar de contar co proxecto aprobado desde 2023. “Con iso xa queda todo dito”, concluíu.