Os traballos durarán tres meses e teñen como finalidade dotar o lugar dunha zona segura para o paso peonil entre beirarrúas, especialmente para protexer as persoas usuarias da escola infantil.

O Concello de Santiago iniciou este martes as obras de construción dun paso elevado na rúa das Rodas, co obxectivo de mellorar a seguridade peonil e, en especial, a das crianzas que acoden á escola infantil que existe nese punto.

A obra foi adxudicada por 63.340 euros, cun prazo de execución de tres meses. O corte total da rúa durará ata que se rematen os traballos da primeira fase. Os detalles da afectación ao tráfico e ao transporte urbano pódense consultar neste enlace.

O punto en que se implanta esta plataforma é un punto importante de acceso á Cidade Histórica, que formaba parte do antigo foxo da muralla, e de conexión da améndoa cos barrios adxacentes, espazos verdes e equipamentos importantes.

Dada a importancia dos pavimentos pétreos, que forman parte da identidade do centro de Santiago de Compostela e do Camiño de Santiago, executarase unha plataforma continua que iguale a cota en ambas as beirarrúas, como unha prolongación do característico pavimento e tamén da preferencia peonil. Colocarase tamén a drenaxe necesaria para a correcta evacuación da auga e incorporarase verde urbano e pequenos espazos de estancia para mellorar a calidade do espazo.

Hoxe comezaron as actuacións previas, de demolición dos pavimentos existentes, despois do corte de tráfico e o acopio de materiais que tivo lugar onte, data efectiva do inicio da obra. Nas próximas semanas continuarase coa execución da base nos novos pavimentos.