 O Concello de Ribeira colabora con esta Festa de Interese Turístico Galego

O produto do mar será o protagonista no 2 de agosto coa XXVII Festa do Percebe de Aguiño que se desenvolverá na explanada portuaria a carón da lonxa desta parroquia ribeirense; un evento gastronómico declarado Festa de Interese Turístico Galego.

A alcaldesa de Ribeira, María Sampedro, ratificou o apoio da Administración local a esta iniciativa que converte á parroquia ribeirense en “capital mundial do percebe” cun produto “de excelente calidade, do noso territorio. A xente sabe o que come e quen o recolle.” Neste senso, a mandataria local manifestou que se continúa traballando na difusión desta festa e posta en valor deste recurso mariño para aspirar nun futuro a acadar o selo de Festa de Interese Turístico Nacional.

Pola súa parte, o concelleiro do Mar, Fernando Abraldes, referiuse á transcendencia “do rei do mar” para Aguiño a nivel económico e tamén social. “Vivimos case toda a parroquia do percebe”, apuntou.

No transcurso da festa agárdase repartir unha tonelada deste crustáceo a un prezo similar ao doutros anos, que dependerá das poxas nos días previos, segundo aclarou o patrón maior da Confraría de Pescadores Carreira-Aguiño, José Antonio Santamaría, para que o maior número de persoas poida acceder ás racións dun recurso que se extraerá da zona norte comprendida entre Falcoeiro e Basoñas, tal e como precisou o presidente da agrupación de mariscadores do pósito, Manuel Ángel Reiriz.

A confraría atópase actualmente perfilando os detalles cara esta vixésimo sétima edición, entre eles, os nomes das persoas que serán recoñecidas co título de percebeiros de honra.