Neda programa este venres, 19 de xuño, unha competición oficial de boccia, deporte paralímpico de precisión, que practican persoas con parálise cerebral ou con grandes discapacidades físicas. A cita, impulsada por Asociación sociocultural ASCM, permitirá á veciñanza descubrir esta disciplina, seguindo en directo o xogo do Club ADM Ferrol.

A pista polideportiva do Roxal acolle, de 16 a 19 horas, a competición federada na que os xogadores/as, dende as súas cadeiras de rodas, deben lanzar as súas bólas o máis preto posible dun branco fixo, unha pelota que actúa como diana, ao tempo que intentan separar as dos rivais. Polo tanto, supón unha combinación de puntería e de táctica.

A iniciativa de ASCM, que conta coa colaboración do Concello de Neda, persegue dar a coñecer esta disciplina paralímpica, que permite a práctica de exercicio por parte de persoas con discapacidade e un elevado nivel de afectación funcional, brindado ademais a quen se achegue a posibilidade de probar a experiencia.