Neda volve ser neste 2026 un dos 20 municipios galegos nos que se desenvolverá o proxecto Aloumiños, destinado a favorecer as relacións socias e mellorar o benestar físico e emocional da poboación maior. A iniciativa botará a andar este xoves con encontros veciñais en Viladonelle e no núcleo urbano para contactar coas persoas interesadas en sumarse aos grupos e participar nas actividades.

O proxecto, xurdido da colaboración entre o Colexio de educadores e educadoras sociais e o Sergas, conta co apoio municipal e busca crear espazos de encontro para mellorar o benestar asociado ás relacións interpersoais e ao apoio social. Un segundo obxectivo é contribuír a mellorar a saúde física e mental da poboación, mediante a intervención sociocomunitaria.

Dende o Concello anímase á veciñanza, especialmente nedenses de 65 anos en diante, a participar nas primeiras reunións fixadas para este xoves, 11 de xuño, tanto no local social de Viladonelle (10:30 horas) como na Casa da Cultura (12:00 horas)

Estes encontros servirán para falar das actividades semanais que se desenvolverán semanalmente ata o mes de outubro–pequenas andainas, actividades culturais e de lecer, obradoiros sociosanitarios…- así como para que a xente interesada se coñeza e se apunte.

Aquelas persoas que non poidan asistir aos almorzos, pero desexen ter información ou queiran participar en Aloumiños, poden chamar ao 694314517.